Իրանի և Ռուսաստանի նախագահներն անդրադարձել են երկկողմ փոխգործակցության հարցերին
Իրանի Իսլամական Հանրապետության նախագահ Էբրահիմ Ռայիսին և Ռուսաստանի Դաշնության նախագահ Վլադիմիր Պուտինը հեռախոսազրույց են ունեցել, որի ընթացքում անդրադարձել են երկկողմ փոխգործակցությանը վերաբերող հարցերին։ Ինչպես տեղեկացնում է ռուսական ՏԱՍՍ լրատվական գործակալությունը, այս մասին ասել է Կրեմլի մամուլի քարտուղար Դմիտրի Պեսկովը։
Պեսկովը հայտնել է, որ երկու նախագահները քննարկել են Իրանի և Ռուսաստանի երկկողմ հարաբերությունները։
«Երկու կողմերը համակարծիք են եղել, որ Իրանի և Ռուսաստանի հարաբերությունները զարգանում են դրական ուղղությամբ, քննարկվել են նաև տարբեր ոլորտներում երկկողմ համագործակցության հարցերը»,- ասել է նա։
Ավելի վաղ երկու նախագահները հեռախոսազրույցի ընթացքում քննարկել էին նաև Սիրիայում տիրող իրավիճակը, տրանսպորտի և էներգետիկայի ոլորտներում համագործակցությունը։
Նշենք, որ սա 2023 թվականի ընթացքում Ռուսաստանի և Իրանի նախագահների միջև երրորդ հեռախոսազրույցն է։
Добавить комментарий