Օսլոյի օդանավակայանը ժամանակավոր արգելել է վայրէջքները՝ օդային տարածքում ԱԹՍ-ի պատճառով

Նորվեգիայի Օսլոյի օդանավակայանում ժամանակավորապես դադարեցվել են վայրէջքները՝ օդանավակայանի տարածքում անօդաչու թռչող սարքերի հայտնվելու մասին հաղորդումից հետո։

Ինչպես հայտնում է Reuters-ը՝ հղում անելով նորվեգական NTB գործակալությանը, միջադեպը տեղի է ունեցել հոկտեմբերի 6-ի գիշերը՝ կեսգիշերից հետո։ «Norwegian Air» ավիաընկերության օդաչուն ոստիկանությանը հայտնել է, որ օդանավակայանին մոտենալիս նկատել է երեքից հինգ անօդաչու թռչող սարք։ Դեպքից հետո մի քանի օդանավերի վայրէջքներ տեղափոխվել են դեպի այլ օդանավակայաններ։

Ոստիկանության տվյալներով՝ տեղեկությունը դեռևս չի հաստատվել, իսկ առավոտյան Օսլոյի օդանավակայանի աշխատանքը լիովին վերականգնվել է։