Ես չեմ բացառում Հայաստանի և Ադրբեջանի ղեկավարների փոխադարձ այցելությունները, բայց կան հարցեր․ Ալեն Սիմոնյան

Ես չէի բացառի այն հնարավորությունը, որ որոշ միջազգային ձևաչափերի շրջանակներում... թող նրանց (Ադրբեջանի – խմբ.) նախագահը գա Հայաստան, թող մեր երկրի ղեկավարը գնա նրանց մոտ, ես նույնպես պատրաստ եմ գնալ (Ադրբեջան – խմբ.): Այս մասին հոկտեմբերի 22-ին լրագրողների հետ զրույցում հայտարարել է Հայաստանի խորհրդարանի նախագահ Ալեն Սիմոնյանը:

«Բայց կան հարցեր, որոնք դրանից առաջ պետք է քննարկել։ Դա ոչ միայն անվտանգության հարցն է, այլև պահվող անձանց հարցը։ Մեր համար դժվար է մեկնել... Ինչպե՞ս մեկնել այնտեղ՝ իմանալով, որ այնտեղ միաժամանակ պահվող անձինք կան։ Նրանց մեջ կան թե՛ գերիներ, թե՛ պատանդներ։ Ես լավատես եմ, բայց մենք չենք խոսում թեմայի շուրջ, քանի դեռ կոնկրետ արդյունք չկա»,- ընդգծել է նա։

Սիմոնյանը հայտնել է, որ այն մթնոլորտը, որում անցել է իր հանդիպումն Ադրբեջանի խորհրդարանի խոսնակի հետ, նույնիսկ ավելի լավ է եղել, քան շատ այլ միջազգային գործընկերների հետ։

Նա հավելել է, որ տեսել է Ադրբեջանի խորհրդարանի խոսնակի վերաբերմունքը խաղաղության նկատմամբ։

«Մենք երկուսս էլ ցանկանում ենք, որ կոնֆլիկտը մեկընդմիշտ հարթվի։ Նրանք էլ են ուզում իրենց մոտ ունենալ «բոլոր փաստաթղթերը» ապագայի համար։ Ընդ որում, Հայաստանի Սահմանադրության մեջ խնդիրներ չկան։ Միևնույն ժամանակ Ադրբեջանը ցանկանում է, որ 10-20 տարի հետո որևէ երրորդ ուժ, նույնիսկ արտաքին ուժ, չփորձի իրար դեմ հանել նախկին երկու խորհրդային հանրապետություններին։ Իմ մտադրությունը նույնն է»,- նշել է Սիմոնյանը։

Նա հայտնել է, որ Ադրբեջանի ընկալմամբ՝ «մենք նրանց տարածքների 20%-ը պահում ենք օկուպացիայի տակ»։

«Որպեսզի երկխոսություն կայանա, բացի սեփական դիրքորոշումը ձևավորելուց, պետք է հասկանալ մյուս կողմի դիրքորոշումը։ Նրանք համարում են, որ միջազգային բախում է հրահրվել, որպեսզի այդ ֆոնին ԽՍՀՄ-ի փլուզման թեման դառնա երկրորդական և այդ սադրանքի արդյունքում հայկական զորքերը՝ ռուսական զորքերի աջակցությամբ, գրավել են իրենց տարածքի 20-30%-ը։ Դա նրանց դիրքորոշումն է։ Մենք կարող ենք համաձայն չլինել այդ դիրքորոշման հետ, բայց մենք պետք է իմանանք նրանց դիրքորոշումը, որպեսզի հասկանանք, ինչպես կառուցել երկխոսությունը»,- ընդգծել է նա։