Ադրբեջանի «խաղաղասիրական» հայտարարությունների մյուս երեսը. քաղաքական հաշվեհարդար՝ Արցախի ղեկավարների նկատմամբ

Ադրբեջանի՝ «խաղաղության» մասին բարձրագոչ հայտարարությունների ֆոնին իրականությունն այլ է։

Նոյեմբերի 13-ին շարունակվել է Արցախի նախկին ռազմաքաղաքական ղեկավարների և այլ հայ գերիների շինծու գործերով հերթական դատական նիստը։

 Ադրբեջանական լրատվամիջոցների հաղորդմամբ՝ երկրի դատախազը պահանջել է ցմահ ազատազրկում Արցախի նախկին նախագահ Արայիկ Հարությունյանի և Արցախի նախկին արտգործնախարար Դավիթ Բաբայանի համար։

Դատախազը նաև պահանջել է 20 տարվա ազատազրկում Արցախի նախկին նախագահներ Բակո Սահակյանի և Արկադի Ղուկասյանի, ինչպես նաև մի շարք տարեց գերիների նկատմամբ։
Մյուս հայ ռազմագերիների համար ներկայացվել են 16-ից 19 տարվա ազատազրկման պահանջներ։

«Դատավարությունը» կշարունակվի նոյեմբերի 27-ին։

Բաքուն փորձում է միջազգային հանրությանը համոզել իր «խաղաղասիրական» քայլերի անկեղծության մեջ, մինչդեռ նրա գործողությունները հակասում են խաղաղության, արդարության և մարդու իրավունքների վերաբերյալ իր իսկ հայտարարություններին։