Արաբական երկրները դիմել են Հարավային Կորեային՝ ՀՕՊ համակարգեր ձեռք բերելու հարցով

Սաուդյան Արաբիան, Արաբական Միացյալ Էմիրությունները և Կատարը բանակցություններ են վարում Հարավային Կորեաի հետ՝ հակաօդային պաշտպանության համակարգերի ձեռքբերման շուրջ։

Ինչպես հաղորդում է The Wall Street Journal-ը, արաբական երկրների այս քայլը պայմանավորված է ամերիկյան արտադրության զենիթային հրթիռների պաշարների զգալի նվազմամբ, ինչը նրանց ստիպում է որոնել նոր մատակարարներ։

Ռազմական պաշարների կրճատումը կապված է Իրանի կողմից արձակված անօդաչու թռչող սարքերի և հրթիռների դեմ իրականացված ակտիվ պաշտպանական գործողությունների հետ։ Ստեղծված իրավիճակը ցույց է տվել Պարսից ծոցի երկրների բարձր կախվածությունը ԱՄՆ-ից և սպառազինության մատակարարման հետ կապված հնարավոր ռիսկերը։

Որպես այլընտրանք ամերիկյան սպառազինությանը՝ դիտարկվում են հարավկորեական «Cheongung-II» (M-SAM) հակաօդային պաշտպանության համակարգերը, որոնք առանձնանում են արագ տեղակայման հնարավորությամբ և համեմատաբար մատչելի արժեքով։

Ընթացող բանակցությունների հիմնական նպատակը տարածաշրջանի օդային տարածքի պաշտպանունակության ամրապնդումն է։