Հյուսիսային և Հարավային Կորեաների սահմանը պետք է դառնա անառիկ ամրոց. Կիմ Չեն Ըն

Հյուսիսային Կորեայի և Հարավային Կորեայի սահմանը պետք է դառնա անառիկ ամրոց, հայտարարել է հյուսիսկորեական առաջնորդ Կիմ Չեն Ընը։ Նման պահանջ նա ներկայացրել է դիվիզիաների և բրիգադների հրամանատարների հետ հանդիպման ժամանակ, հայտնել է Կորեայի կենտրոնական հեռագրական գործակալությունը, հաղորդում է ՌԻԱ Նովոստի-ն:

«Մասնավորապես, նա անդրադարձել է տարածքի պաշտպանության վերաբերյալ մեր կուսակցության քաղաքականությանը, որն ուղղված է հարավային սահմանը հսկող առաջնագծի ստորաբաժանումների ամրապնդմանը և սահմանագիծն անառիկ ամրոցի վերածելուն»,- ասված է հրապարակման մեջ։

Դրա համար, Կիմ Չեն Ընի խոսքով, անհրաժեշտ է վերանայել բանակային ստորաբաժանումների կառուցվածքը և ռազմատեխնիկական առումով ամրապնդել սահմանին գտնվող զորամասերը։

Բացի այդ, նա բանակին կոչ է արել ճանաչել գլխավոր հակառակորդին և բարձրացնել դասակարգային գիտակցությունը։