Լեհաստանում մեկնարկում են «կամավորների կոալիցիայի» առաջին զորավարժությունները

Լեհաստանում այսօր մեկնարկում են Ուկրաինային աջակցել ցանկացող երկրների, այսպես կոչված, «կամավորների կոալիցիայի» առաջին համատեղ զորավարժությունները: Ֆրանսիայի զինված ուժերի հայտարարության համաձայն՝ դրանց կմասնակցի մոտ 2800 զինծառայող 11 երկրից: Զորավարժությունները կտևեն մինչև նոյեմբերի 22-ը, հայտնում է Deutsche Welle-ն:

Ինչպես հաղորդում է AFP-ն, Գերմանիան զորավարժություններին կուղարկի մոտ տասը շտաբային սպա, լիցքավորող ինքնաթիռներ և լոգիստիկ ստորաբաժանումներ, ինչպես նաև կապահովի լոգիստիկ աջակցություն իր տարածքում զորքերի և պաշարների տեղաշարժի համար։

Ֆրանսիայի և Մեծ Բրիտանիայի առաջնորդությամբ իրականացվող զորավարժությունների նպատակն է պատերազմից հետո Ուկրաինայի երկարաժամկետ անվտանգությունն ապահովելու մեխանիզմների կիրառումը: Այս երկրները զորավարժությունների համար կտրամադրեն ամենամեծ զորակազմը՝ Ֆրանսիան՝ 1100 զինծառայող, իսկ Մեծ Բրիտանիան՝ 300:

Օդուժի և ցամաքային ուժերի մասնակցությամբ զորավարժությունները տեղի կունենան Լեհաստանի հարավ-արևելքում գտնվող Նովա Դեբա քաղաքի մոտակայքում, Ուկրաինայի սահմանից մոտ 100 կիլոմետր հեռավորության վրա։

Առանձին տարրեր կփորձարկվեն նաև Ֆրանսիայում՝ Փարիզում գտնվող Ուկրաինայի բազմազգ ուժերի (Multinational Force Ukraine, MNF-U) շտաբ-բնակարանում, իսկ զորավարժության ծովային բաղադրիչը Ստամբուլից թուրքական ղեկավարությամբ կանցկացվի Սև ծովում անվտանգության և ականազերծման իմիտացիոն գործողությունների տեսքով։

Ֆրանսիայից, Միացյալ Թագավորությունից և Գերմանիայից բացի, զորավարժություններին կմիանան Բելգիան, Էստոնիան, Լիտվան, Նիդեռլանդները, Լեհաստանը, Իսպանիան, Շվեդիան և Թուրքիան: «Կամավորների կոալիցիային» ներկայումս մասնակցում է մոտ 35 երկիր: