Իրանի ԱԳ նախարարը հայտնել է ՄԱԳԱՏԷ-ի հետ բանակցություններում առաջընթացի մասին
Իրանի Իսլամական Հանրապետության արտաքին գործերի նախարար Հոսեյն Ամիր Աբդոլլահիանը հայտարարել է, որ Ատոմային էներգիայի միջազգային գործակալության (ՄԱԳԱՏԷ) հետ տեխնիկական բանակցություններում առաջընթաց է արձանագրվել, իսկ պատվիրակությունների փոխանակումն իրականացվում է առանց հրապարակայնացման։ Ըստ «Դետք»-ի՝ այս մասին Աբդոլլահիանն ասել է իրանական պետական IRNA լրատվական գործակալությանը տված հարցազրույցում։
Իրանի արտգործնախարարը հաստատել է նաև, որ Իրանն ու ԱՄՆ-ն շարունակում են անուղղակիորեն ուղերձներով փոխանակվել։ «Այո, մենք շարունակում ենք հաղորդագրություններ ստանալ ամերիկացիներից և միջնորդների միջոցով հաղորդագրություններ ուղարկել նրանց»,- ասել է նա։
Մեկնաբանելով Իրանի և ՄԱԳԱՏԷ-ի համագործակցությունն ու գործակալության կողմից երկրի միջուկային օբյեկտներում նոր տեսախցիկների տեղադրումը՝ Իրանի արտգործնախարարն ասել է՝ Թեհրանն ակնկալում է, որ ՄԱԳԱՏԷ-ն կհրաժարվի իր քաղաքական մոտեցումից։ Նրա խոսքով՝ որքան գործակալությունը հեռանում է տեխնիկական համագործակցության քաղաքական մոտեցումից, այնքան ճանապարհ է բացվում երկկողմ պայմանավորվածությունների իրականացման համար։
Աբդոլլահիանը նշել է, որ Իրանը, հավատարիմ մնալով Մեջլիսի ընդունած օրենքին, ձգտում է անել հնարավոր ամեն բան՝ անհիմն անորոշությունները և մեղադրանքները վերացնելու համար․ «Մենք ՄԱԳԱՏԷ-ի հանդիպման նախօրեին ենք և անկեղծորեն ասել ենք Գրոսսիին, որ առանց օտարերկրյա կողմերի միջամտության մենք կարող ենք շարունակել արդյունավետ համագործակցությունը»։
Իրանի գլխավոր դիվանագետը հավելել է նաև, որ երկար ժամանակ անց առաջին անգամ արտաքին դիվանագիտության ղեկավար Ժոզեպ Բորելը գոհունակություն է հայտնել բանակցային գործընթացի կապակցությամբ՝ հիմնվելով գործակալությունից ստացված զեկույցների վրա։ «Չենք կարող ասել, որ մենք բավարարել ենք գործակալությանը, որոշ պնդումներ դեռևս ուժի մեջ են, բայց ՄԱԳԱՏԷ-ն նույնպես դրական քայլեր է ձեռնարկել»,- եզրափակել է նա։
#Դետքի_հետագծով
Իրանի Իսլամական Հանրապետությունն իր հերթին կողմնակից է միջուկային համաձայնագրի վերականգնմանը, որի շուրջ բանակցությունները շարունակվում են 2021 թվականից, երբ ԱՄՆ նախագահի պաշտոնը ստանձնեց Ջո Բայդենը։ Այս համաձայնագիրը, որը ձեռք էր բերվել երկարատև բանակցությունների արդյունքում, Թեհրանին թույլ էր տալիս խուսափել պատժամիջոցներից, զարգացնել երկրի տնտեսությունը և բարձրացնել բնակչության կենսամակարդակը։
Добавить комментарий