Եթե Բաքուն շարունակի պնդել «Զանգեզուրի միջանցքի» հարցում, Իրանը կդիմի վճռական քայլերի
Ամերիկաբնակ իրանցի փորձագետ Մոհամմադ Այաթոլլահի Թաբարը հայտարարել է, որ եթե Ադրբեջանը շարունակի պնդել այսպես կոչված «Զանգեզուրի միջանցքի» հարցում և ուժի կիրառմամբ տիրանա դրան, ապա Իրանը կդիմի վճռական գործողությունների։ Ըստ «Դետք»-ի՝ այս մասին տեղեկացնում է իրանական «ParsToday» լրատվական գործակալությունը։
Փորձագետն ընդգծել է, որ Ադրբեջանի կողմից ուժի կիրառման դեպքում Իրանը 2020 թվականի նման համբերատար չի գտնվի։ Նա հերթական անգամ նշել է, որ իրանական կողմը դեմ է այսպես կոչված «Զանգեզուրի միջանցքի» ստեղծմանը։
Թաբարի խոսքով՝ չնայած իր տարածաշրջանային ազդեցությանը՝ Իրանը դեռևս անմիջականորեն չի միջամտում հարևան երկրների գործերին և նախընտրում է գործել իր դաշնակիցների ու ներկայացուցիչների միջոցով։ Նա վերահաստատել է, որ հայ-իրանական սահմանի պահպանումը Թեհրանի համար կարմիր գիծ է։
«Հետևաբար չի բացառվում, որ Իրանը որոշակի աջակցություն ցուցաբերի Հայաստանին կամ համագործակցի Ադրբեջանի շիա ուժերի հետ՝ Բաքվի ռեժիմին դիմակայելու և իր հյուսիսարևմտյան սահմանները պաշտպանելու համար»,- եզրափակել է նա։
#Դետքի_հետագծով
Իրանական կողմը դեմ է այսպես կոչված «Զանգեզուրի միջանցքի» ստեղծմանը և բազմիցս արտահայտել է այս հարցում իր սկզբունքային դիրքորոշումը։ Նման հայտարարություններն Ադրբեջանում դժգոհություններ են առաջացնում, քանի որ այդ երկրի հասարակական-քաղաքական շրջանակները պնդում են, որ երբ իրենց համոզմամբ Ադրբեջանի տարածքային ամբողջականությունն էր խախտված, Իրանը նման կերպ չի արձագանքել և փաստացի ճանաչել է ստեղծված ստատուս քվոն։
Добавить комментарий