Ռուսաստանը ցանկանում է Իրանին փոխանցել «MИ-28» և «KA-52» մարտական ուղղաթիռները

Ռուսաստանը դիտարկում է Իրանին «MИ-28» և «KA-52» մարտական ​​ուղղաթիռներ վաճառելու հնարավորությունը։ Այս մասին տեղեկացնում է «Newsweek» պարբերականը՝ վկայակոչելով Պատերազմի ուսումնասիրման ամերիկյան ինստիտուտի վերլուծությունը։

Ամերիկյան ինստիտուտը, հղում կատարելով իրանական «Tansim» լրատվական գործակալության հրապարակմանը, տեղեկացնում է, որ Մոսկվան և Թեհրանը նախատեսում են մարտական ուղղաթիռների նույն մոդելների համատեղ արտադրություն իրականացնել։

Իրանական հրատարակությանը հայտնի է դարձել, որ Իրանի ղեկավարությունը դիտարկում է երկրի ռազմածովային և ցամաքային զորքերի, ինչպես նաև Իսլամական հեղափոխության պահապանների կորպուսի ուղղաթիռների խմբաքանակ ձեռք բերելու հնարավորությունը։

Ամերիկյան ինստիտուտի զեկույցում նշվում է, որ Ռուսաստանը շարունակում է խորացնել ռազմական և տնտեսական հարաբերություններն Իրանի հետ՝ փորձելով փոխշահավետ կերպով խուսափել արևմտյան պատժամիջոցների ազդեցությունից։

«MИ-28»-ը խորհրդային և ռուսական հարվածային ուղղաթիռ է, որը նախատեսված է տանկեր և այլ զրահատեխնիկա, ինչպես նաև ցածր արագությամբ օդային թիրախներ ու թշնամու կենդանի ուժ որոնելու և ոչնչացնելու համար:

«KA-52»-ը հայտնի է որպես մարտական ​​ուղղաթիռ, որն իրականացնում է տարածքի հետախուզություն, թիրախավորում և մարտական ​​ուղղաթիռների խմբի գործողությունների համակարգում։ Այն կարող է խոցել մարտադաշտում գտնվող զրահապատ և անզրահ մեքենաներ, կենդանի ուժ և օդային թիրախներ։ Այն KA-50 «Black Shark» մոդելի մշակման շարունակությունն է։