Իսկ ո՞ւմ համար էր հաղթանակը, ինչո՞ւ այդ հաղթանակի արդյունքում ՀՀ բնակչությունը նվազեց. Փաշինյան

Կա վարկած, որ օրինակ, նույն 1999 թվականի հոկտեմբերի 27-ի իրադարձությունները կապ ունեն բանակցային գործընթացի հետ, մասնավորապես, տարածքների փոխանակման հայեցակարգի հետ. սա վարկած է, որը մինչ օրս քրեաիրավական առումով ապացուցված ու հիմնավորված չէ, բայց չի էլ բացառվում, որ կարող է քննության առարկա դառնալ: Այս մասին հայտարարել է Նիկոլ Փաշինյանը հունիսի 27-ին 44-օրյա պատերազմի հանգամանքներն ուսումնասիրող ԱԺ քննիչ հանձնաժողովի նիստին:

«1994 թ., երբ հաստատվեց զինադադար, արձանագրվեց, որ հայկական կողմը հաղթել է պատերազմում, իսկ ադրբեջանական կողմը պարտվել է: Դրանից հետո 20 տարվա ընթացքում Ադրբեջանի բնակչությունը համարյա կրկնապատկվեց, ՀՀ բնակչությունն էականորեն նվազեց: Իսկ ո՞ւմ համար էր հաղթանակը, ինչո՞ւ այդ հաղթանակի արդյունքում ՀՀ բնակչությունը ոչ թե ավելացավ, այլ նվազեց, ինչո՞ւ այդ հաղթանակի արդյունքում տնտեսական մրցակցության մեջ չկարողացավ հաղթել Ադրբեջանին: Սա կապ ունի անվտանգության, ռազմական բյուջեների հետ:

Նաև գիտենք, որ 1997-1998-ին ԼՂ հարցը ներքաղաքական իմաստով շատ կարևոր նշանակություն է ունեցել»,- ասել է Փաշինյանը: