Զեկուցվել է, որ պատերազմի հավանականությունը 30 տոկոս է. Փաշինյան

Երբ վարչապետի պաշտոնը ստանձնել եմ, անընդհատ ստացել եմ զեկուցագրեր, ԱԱԾ-ն անընդհատ ահազանգել է պատերազմի հնարավորության մասին: Այս մասին հայտարարել է Նիկոլ Փաշինյանը հունիսի 27-ին 44-օրյա պատերազմի հանգամանքներն ուսումնասիրող ԱԺ քննիչ հանձնաժողովի նիստին։ Նա նաև նշել է, որ ԱԱԾ-ն անգամ հնարավոր պատերազմի ժամկետներ է հնչեցրել։

Փաշինյանի խոսքով՝ ինքն այլ զեկուցագրեր էլ է ստացել։ Իրեն նաև զեկուցվել է, որ միջազգային գործընկերները նույնպես պատերազմը քիչ հավանական են համարում և կոչ են անում, որ ՀՀ ԶՈՒ-ն կտրուկ գործողություններ չիրականացնի՝ «չեղած տեղից» պատերազմ չսադրելու համար։

«Ինձ զեկուցվել է, որ պատերազմի մեկնարկի հավանականությունը 30 տոկոս է, և որ սա հոգեբանական ճնշում է քաղաքական իշխանության վրա, որ գնանք անհամաչափ զիջումների,- հայտարարել է վարչապետը:- Իմ քաղաքական հրահանգը եղել է՝ լինել իրավիճակին համարժեք: 2020-ի հունիսին ՊՆ-ում ունեցել եմ խորհրդակցություն, որտեղ հարց եմ տվել՝ մենք ունե՞նք այնպիսի ինդիկատորներ, որոնց ի հայտ գալու դեպքում գնահատում ենք, որ վերջ, հարձակում է տեղի ունենալու: Ինձ ասել են՝ կան այդպիսի ինդիկատորներ: Իմ հրահանգը եղել է միանշանակ, որ անկախ ամեն ինչից՝ ես հիմա բաց հրահանգ եմ տալիս, որ եթե այդ ինդիկատորներն ի հայտ գան, բանակը պետք է սահմանված ձևով գործի»:

«Օնիկ Գասպարյանը քննիչ հանձնաժողովում հայտնել է, որ պատերազմից առաջ ՀՀ ԶՈՒ-ն մաս-մաս բերվում էր առաջին աստիճանի պատրաստականության, որովհետև ռադիոկլանման միջոցով 2020 թվականի սեպտեմբերի 25-ին որսացել էին Գյանջայի հատվածում թուրքական «F-16» կործանիչների օդաչուների խոսակցությունը, ըստ որի՝ «կիրակի օրը նրանք ինչ-որ կարևոր բանի պետք է մասնակցեին»։ Գասպարյանը շեշտել է, որ այս տեղեկությունները ստանալուց հետո ինքը «ինտուիցիայով նախապատրաստական բոլոր աշխատանքներն արել է»,- նշել է Անդրանիկ Քոչարյանը։

Դրան ի պատասխան՝ Փաշինյանն ասել է, որ սեպտեմբերի 25-ին այդ տեղեկությունն իրեն զեկուցվել է: