Իրանի ռազմավարությունը երկրի սահմաններն ավելի ապահով դարձնելն է. Ռայիսի
Իրանի Իսլամական Հանրապետության նախագահ Էբրահիմ Ռայիսին հայտարարել է, որ երկրի ռազմավարությունը սեփական սահմաններն ավելի ապահով, անվտանգ դարձնելն է և տնտեսական սահմանների վերածելը։ Ըստ «Դետք»-ի՝ իրանական պետական IRNA լրատվական գործակալությունը տեղեկացնում է, որ այս մասին Ռայիսին ասել է Պակիստանի բանակի հրամանատար Սեյեդ Ասեմ Մոնիրի հետ հանդիպման ժամանակ։
Ռայիսին շեշտել է՝ սահմանային շուկաների զարգացումն ու էներգետիկ ոլորտում համագործակցության ընդլայնումն այս ռազմավարության իրականացման ուղիներից են։ Նա միևնույն ժամանակ նշել է երկու երկրների գործունեությանը թափ հաղորդելու անհրաժեշտությունը վերոհիշյալ նպատակների իրականացման համար։
Իրանի նախագահն ուշադրություն է հրավիրել այն բանին, որ հարևան, դաշնակից և մուսուլմանական երկրների հետ հարաբերությունների ամրապնդումն Իրանի արտաքին քաղաքականության առաջնահերթություններից է։ Նա այս համատեքստում հայտնել է, որ Իրանի և Պակիստանի միջև ստորագրված համաձայնագրերի արագ իրագործումն առավել քան երբևէ կնպաստի առևտրատնտեսական համագործակցության և քաղաքական հարաբերությունների մակարդակի բարձրացմանը:
Պակիստանի բանակի հրամանատար Սեյեդ Ասեմ Մոնիրն իր հերթին բարձր է գնահատել հարևան երկրների, հատկապես Պակիստանի հետ հարաբերությունների ամրապնդման կապակցությամբ Իրանի Իսլամական Հանրապետության քաղաքականությունը։ Նրա համոզմամբ՝ Թեհրանի քաղաքականությունն իսլամական աշխարհի համար շատ արժեքավոր հնարավորություն է։
#Դետքի_հետագծով
Ընդհանուր առմամբ Իրանի Իսլամական Հանրապետությունը Պակիստանի հետ ունի բնականոն հարաբերություններ և համագործակցություն։
Միևնույն ժամանակ երկու երկրներն ունեն համագործակցության միմյանց հետաքրքրող խնդիրներ՝ կապված սահմանների անվտանգության հետ։ Մասնավորապես Պակիստանում գտնվող և այդ երկրի իշխանությունների կողմից չվերահսկվող գրոհային խմբերը վտանգ են ներկայացնում նաև Իրանի համար, իսկ վերջինս տարբեր կերպ փորձում է չեզոքացնել այդ վտանգը։
Добавить комментарий