ԱՄՆ-ն շարունակում է տեխնիկա և սպառազինություն տեղափոխել Սիրիայում գտնվող ռազմակայաններ

ԱՄՆ պաշտպանության նախարարությունը ռազմական և նյութատեխնիկական օժանդակությամբ ևս մեկ շարասյուն է Իրաքից տեղափոխել Սիրիա։ Ինչպես հաղորդում է թուրքական պետական «Անադոլու» լրատվական գործակալությունը, շարասյունն ուղարկվել է ամերիկյան զորքերի կարիքների համար, որոնք տեղակայված են սիրիական Հասաքա նահանգի բազաներում և հարակից շրջաններում:

Հաղորդվում է, որ Ալ-Վալիդ անցակետից իրաք-սիրիական սահմանը հատել է մոտ 70 մեքենա։ Իրաքից Սիրիա են տեղափոխվել երեք զրահամեքենա, երկու ականազերծման մեքենա, ութ վառելիքի մեքենա, ինչպես նաև մեծ թվով բեռնատարներ՝ բեռնված զինամթերքով և բետոնե բլոկներով։

Նշվում է, որ ամերիկյան ավտոշարասյունը հասել է Շեդդադիի մոտ գտնվող բազա։ Ճանապարհին ավտոշարասյան օդային պաշտպանությունն ապահովվել է ուղղաթիռների միջոցով։

Սիրիայում գտնվող ռազմակայաններին ԱՄՆ հրամանատարությունն օժանդակություն է հատկացրել նաև հունվարի 6-ին, 8-ին և 22-ին։

Նշենք, որ 2019 թվականի հոկտեմբերին, թուրքական զինված ուժերի կողմից Սիրիայի տարածքում իրականացվող ռազմական գործողության մեկնարկի ֆոնին, Միացյալ Նահանգները լքեց Սիրիայում գտնվող բազաների մի մասը՝ ուժերը կենտրոնացնելով այս երկրի արևելքում գտնվող նավթահանքերի տարածքում։