ԱՄՆ-ն Ուկրաինային է փոխանցելու մինչև 150 կմ հեռահարությամբ հրթիռներ. «Reuters»

«Reuters» գործակալությունը, վկայակոչելով իր աղբյուրները, հայտնում է, որ ԱՄՆ-ն մտադիր է մոտ ապագայում Ուկրաինային փոխանցել մինչև 150 կիլոմետր հեռահարությամբ հրթիռներ:

Շվեդ-ամերիկյան նախագծման այս հրթիռներն արձակվում են նաև HIMARS կայանքներից և կարող են խոցել շարժվող թիրախները տասնյակ կիլոմետրեր հեռավորության վրա:

Մինչ այժմ ուկրաինական բանակին ամերիկացիների և այլ դաշնակիցների կողմից մատակարարվող հրթիռների հեռահարությունը 80 կիլոմետրից մի փոքր ավելի էր. դրանք նույնպես HIMARS կայանքների համար նախատեսված հրթիռներ են։

Ուկրաինան երկար ժամանակ ԱՄՆ-ից և դաշնակիցներից պահանջում է մինչև 300 կիլոմետր հեռահարությամբ բարձր ճշգրտության ATACMS հրթիռներ, որոնք կարող են արձակվել HIMARS կայանքներից: Մինչ այժմ արևմտյան դաշնակիցները հրաժարվում էին նման զինատեսակներ փոխանցելուց, ոչ պաշտոնական տեղեկություններով, քանի որ մտավախություն ունեն, թե ուկրաինացիները կսկսեն խոցել թիրախներ Ռուսաստանի տարածքի խորքում, ինչը կարող է հանգեցնել պատերազմի անվերահսկելի էսկալացիայի։

Ըստ «Reuters»-ի տվյալների՝ 2․2 միլիարդ դոլար արժողությամբ ռազմական օգնության նոր փաթեթի մասին կհայտարարվի արդեն այս շաբաթ: