Իրանը Հայաստանի համար բարեկամ երկիր է և կարևոր գործընկեր. Մհեր Գրիգորյան
Հայաստանի փոխվարչապետ Մհեր Գրիգորյանը հայտարարել է, որ Իրանը Հայաստանի համար բարեկամ երկիր է և կարևոր գործընկեր՝ կոչ անելով կանոնավոր փոխգործակցություն իրականացնել Երևանի և Թեհրանի միջև։ Այս մասին տեղեկացնում է իրանական «Mehr» լրատվական գործակալությունը։
Հաղորդվում է, որ Հայաստանի փոխվարչապետ Մհեր Գրիգորյանի և Իրանի փոխնախագահ Մասուդ Միր Քազեմիի մասնակցությամբ Թեհրանում տեղի է ունեցել հայ-իրանական միջկառավարական համատեղ հանձնաժողովի 17-րդ նստաշրջանի համաձայնագրերի ընթացքի մոնիտորինգի հանձնաժողովի նիստը։
Նիստի ընթացքում քննարկվել են երկու երկրների միջև առևտրատնտեսական հարաբերությունների զարգացման հեռանկարները, ինչպես նաև էներգետիկայի և տրանսպորտի ոլորտում առկա համագործակցության ընդլայնման հնարավորությունները։ Բացի դրանից՝ կողմերը մտքեր են փոխանակել երկկողմ առևտրատնտեսական հարաբերությունների զարգացման և ընդլայնման համար բարենպաստ պայմաններ ստեղծելու հարցերի մասին, այդ թվում՝ ԵԱՏՄ շրջանակում։
Նստաշրջանից մեկ օր առաջ տեղի է ունեցել Մհեր Գրիգորյանի և Իրանի փոխնախագահ Մասուդ Միր Քազեմիի հանդիպումը: Հանդիպման ավարտին Գրիգորյանը նշել է, որ Իրանը Հայաստանի համար բարեկամ երկիր է և կարևոր գործընկեր։
Վերջինս շնորհակալություն է հայտնել իրանական կողմին ջերմ հյուրընկալության համար՝ կարևորելով այս ձևաչափով կանոնավոր քննարկումների անցկացումը։ Փոխվարչապետ Գրիգորյանն Իրանի փոխնախագահ Մասուդ Միր Քազեմիին հրավիրել է այցելել Երևան՝ հաջորդ նման հանդիպումն անցկացնելու համար։
Նշվում է նաև, որ կողմերը երկուստեք շեշտել են, որ կառավարությունները կենտրոնանալու են արձանագրված խնդիրների լուծման վրա։
Добавить комментарий