Այսպես կոչված «Արևմտյան Ադրբեջանի համայնքը» էլեկտրոնային քարտեզ է պատրաստում

Ադրբեջանը, վերջերս հաճախ շրջանառվող «Արևմտյան Ադրբեջան» ասելով, նկատի ունի ներկայիս Հայաստանի Հանրապետության սուվերեն տարածքը։ 

Այդ արհեստածին կազմակերպության նախագահ Ազիզ Ալաքբարլին բացահայտ նշել է, որ Հայաստանն է այսպես կոչված «Արևմտյան Ադրբեջան» համայնքի իրական նպատակը։ 

«Արևմտյան Ադրբեջանում՝ այսօրվա Հայաստանում, թյուրքական ծագում ունեցող տեղանունների հայկականացումը երկար տարիներ ապացուցված է փաստերով։ Հայերը նպատակ են ունեցել ջնջելու ադրբեջանցիների հետքերն այս հողերում»,- «Արևմտյան Ադրբեջանի տեղանունները. պատմության խեղաթյուրումից մինչև վերականգնում» թեմայով հանրային լսումների ժամանակ ասել է Ազիզ Ալաքբարլին: 

Այս մասին, «Դետքի» հաղորդմամբ, հայտնում է ադրբեջանական «Report» կայքը։

Նա պնդել է, որ 1978 թվականի հունվարի 25-ին ՀԽՍՀ հրամանագրով փոխվել է 93 բնակավայրի անվանում։ Նշելով, որ այդ տեղանունների փոփոխությունն անօրինական է, Ալաքբարլին հավելել է, որ պատրաստվում է Արևմտյան Ադրբեջանի էլեկտրոնային քարտեզը, որի վրա արտացոլված են հին տեղանունները։ 

#Դետքի_հետագծով

Ադրբեջանն ակտիվորեն շրջանառում է նաև «Արևմտյան Զանգեզուր» տերմինը, որի անվան ներքո նկատի ունեն Սյունիքի մարզը, իսկ «Արևելյան Զանգեզուր» անվան տակ նկատի ունեն Արցախի Հանրապետության Քաշաթաղի շրջանը։ Այս համայնքը գործում է պետության հովանավորությամբ, ինչն էլ թույլ է տալիս անհիմն մեղադրել և շրջանառության մեջ դնել կեղծ տերմիններ։