Չպետք է թույլ տալ, որ ուկրաինական հակամարտությունը վերածվի Ռուսաստան-ՆԱՏՕ լայնածավալ պատերազմի. Ստոլտենբերգ
ՆԱՏՕ-ի գլխավոր քարտուղար Յենս Ստոլտենբերգը հայտարարել է՝ չպետք է թույլ տալ, որ ուկրաինական հակամարտությունը վերածվի Ռուսաստան-ՆԱՏՕ լայնածավալ պատերազմի։ Ըստ «Դետք»-ի՝ այս մասին տեղեկացնում է բրիտանական «Reuters» լրատվական գործակալությունը։
Վերջինս հայտնել է, որ ՆԱՏՕ-ի գլխավոր խնդիրներից մեկը Ուկրաինայում հակամարտության սրումը կանխելն է:
«ՆԱՏՕ-ն երկու հիմնական խնդիր ունի Ուկրաինայի դեմ ագրեսիայի հետ կապված. մեկը Ուկրաինային աջակցություն ցուցաբերելն է, և մենք դա անում ենք պատերազմի սկզբից, ՆԱՏՕ-ի շատ երկրներ օգնություն են ցուցաբերել Ուկրաինային դեռևս լայնածավալ ներխուժման սկսվելուց առաջ։
Մյուս հիմնական խնդիրն է թույլ չտալ, որ հակամարտությունը վերածվի լայնածավալ պատերազմի Ռուսաստանի և ՆԱՏՕ-ի միջև, քանի որ դա կբերի էլ ավելի մեծ տառապանքների, մահվան և ավերածությունների»,- ասել է նա։
Ստոլտենբերգը նաև հիշեցրել է՝ դաշինքի բոլոր երկրները կարծում են, որ ռազմական գործողությունների պայմաններում Ուկրաինայի լիարժեք անդամակցությունը ՆԱՏՕ-ին անհնար է։ «Բայց, իհարկե, մենք կարող ենք մտածել, թե ինչպես կարելի է Ուկրաինան էլ ավելի մոտեցնել ՆԱՏՕ-ին»,- եզրափակել է նա։
#Դետքի_հետագծով
Չնայած ՆԱՏՕ-ի երկրներն ամեն կերպ աջակցում են Ուկրաինային, այնուամենայնիվ վերջիններս չեն ցանկանում, որ ռուս-ուկրաինական պատերազմը վերածվի ՆԱՏՕ-ՌԴ առճակատման, քանի որ դրա հետևանքներն աղետալի կլինեն ողջ աշխարհի համար։ Հենց այս իրողությունից ելնելով՝ ՆԱՏՕ-ի անդամները ռազմական գործողությունների պայմաններում բացառում են Ուկրաինայի անդամակցության հնարավորությունը։
Добавить комментарий