Այդ հարցի պատասխանը կտա նախաքննությունը. Անդրանիկ Քոչարյանը՝ Վարդենիսում երկու սպայի մահվան դեպքերի մասին

Վարդենիսում երկու սպայի մահվան դեպքից հետո պաշտպանության նախարար Սուրեն Պապիկյանը՝ որպես քաղաքական պատասխանատու, պե՞տք է պաշտոնանկ արվի. այս մասին լրագրողները հարց ուղղեցին ԱԺ պաշտպանության և անվտանգության հարցերի հանձնաժողովի նախագահ Անդրանիկ Քոչարյանին։

«Ոչ»,- կարճ պատասխանեց Քոչարյանը: Թե ում է տեսնում այդ դեպքերի պատասխանատու՝ Քոչարյանն ասաց, թե այդ հարցի պատասխանը կտա նախաքննությունը։

«Նախ պետք է հասկանալ, թե ինչու է եղել ինքնասպանություն, եթե դա ինքնասպանություն է, ու ինչու է տեղի ունեցել սպանություն, եթե սպանություն է, դա պետք է քննվի։ Դուք միանգամից սենսացիոն պաշտոնանկություններ եք ուզում, եթե այդպես գնանք՝ այսօր ոչ մի պաշտոնյա պետք է իր տեղում չլինի»,- ընդգծեց Քոչարյանը։

Հիշեցնենք՝ երեկ Վարդենսիում երկու ողբերգական դեպք է արձանագրվել։

Ժամը 06:20-ի սահմաններում ՊՆ N զորամասի պահպանության տեղամասի N մարտական դիրքում հայտնաբերվել է պայմանագրային զինծառայող Կարեն Արայիկի Կարապետյանի դին՝ հրազենային վնասվածքով:  Նրա սպանության կասկածանքով ժամկետային զինծառայող է ձերբակալվել։

Նույն օրը՝ ժամը 11:30-ի սահմաններում, ՊՆ N զորամասի պահպանության տեղամասում հայտնաբերվել է ավագ ավագ լեյտենանտ Միքայել Սամվելի Դանիելյանի դին՝ հրազենային վնասվածքով: Նա, ըստ Քննչական կոմիտեի, ինքասպան է եղել։