Հայաստանն ու Ադրբեջանն արդեն բավականաչափ հասուն պետություններ են՝ միմյանց միջև առկա խնդիրները լուծելու համար. Էմիրբեյով
Ադրբեջանի նախագահի հատուկ հանձնարարությունների գծով ներկայացուցիչ Էլչին Էմիրբեյովն «Ազատություն» ռադիոկայանին հարցազրույց է տվել:
Այս մասին, «Դետքի» հաղորդմամբ, հայտնում է ադրբեջանական «Report» կայքը։
«Հայաստանն ու Ադրբեջանն արդեն բավականաչափ հասուն պետություններ են և ի վիճակի են լուծելու իրենց միջև առկա խնդիրները, և այդ ուղղությամբ աշխատանքներն իրենց տեմպերով ընթանում են»,- ասել է նա:
Այս համատեքստում նախագահի օգնականը «բացարձակ անհեթեթություն» է անվանել եվրոպական դիվանագիտության ղեկավար Ժոզեպ Բորելի վերջին հայտարարությունը, որտեղ վերջինս նշում էր Ադրբեջանի տարածքային հավակնությունները Հայաստանի նկատմամբ և կոչ էր անում Բաքվին վերադառնալ Երևանի հետ առարկայական բանակցությունների։
Նա անհիմն մեղադրել է Հայաստանին և ընդգծել, որ Հայաստանի կողմից Ադրբեջանի դեմ հարուցված բազմաթիվ դատական գործերը 44-օրյա պատերազմի ավարտից հետո բացահայտ տարածքային պահանջներ են Ադրբեջանի նկատմամբ։
«Ադրբեջանի նկատմամբ տարածքային հավակնությունների պահպանմանը զուգահեռ (Ադրբեջանը տարածքային հավակնություններ ունի Հայաստանի նկատմամբ, ոչ թե հակառակը - խմբ.) Ադրբեջանի կողմից սպառնալիքի մասին միտումնավոր անհեթեթ լուրեր տարածելը ոչ միայն խորամանկություն է, այլև ճանապարհ դեպի ոչ մի տեղ»,- ասել է Էմիրբեյովը:
Բաքվի համար վիճահարույց է նաև Հայաստանի ԱԳՆ պաշտոնական կայքը, որտեղ Արցախյան (խմբ.) խնդրին նվիրված հատվածում ասվում է, թե Արցախը պատմական Հայաստանի անբաժանելի մասն է։ Էմիրբեյովը որպես խնդրահարույց օրինակ նշել է նաև Հայաստանի կողմից Մարդու իրավունքների եվրոպական դատարան ներկայացված վերջին հայցերը, պնդելով, թե դրանցում էլ են եղել «տարածքային նկրտումներ»։
#Դետքի_հետագծով
Ադրբեջանը բացահայտ տարածքային հավակնություններ ունի ՀՀ սուվերեն տարածքի նկատմամբ, և դա ակնհայտ է ադրբեջանական հաղորդումներից ու պետական մակարդակով արված հայտարարություններից: Անհիմն մեղադրանքները Հայաստանի հասցեին միայն փաստում են այդ իրողությունը:
Добавить комментарий