Իսրայելն ու Իրանն այլևս փոխադարձ հարվածներ չեն հասցնի. ԶԼՄ

Իրանի Իսլամական Հանրապետությունն ու Իսրայելն այլևս մտադիր չեն նոր փոխադարձ հարվածներ հասցնել։ Ըստ «Դետք»-ի՝ այս մասին հայտնում է CNN-ը՝ հղում անելով երկրներից մեկի հետախուզական ծառայությունների անանուն աղբյուրին։

Ըստ անանուն աղբյուրի՝ հարձակումների շարքն ավարտվել է։ Հրապարակման համաձայն՝ Իսրայելի վրա իրանական հարձակում չի սպասվում՝ ի պատասխան հրեական պետությանը վերագրվող հարձակման։

Ավելի վաղ ամերիկյան ABC հեռուստաալիքը, վկայակոչելով ԱՄՆ վարչակազմի պաշտոնյային, հայտնել էր, որ Իսրայելը հրթիռային հարված է հասցրել Իրանի տարածքում գտնվող օբյեկտին։ CNN-ը, նույնպես հղում անելով ամերիկացի պաշտոնյային, նշել էր, որ հարձակումն Իսրայելի պատասխանն էր ապրիլի 13-ին Իրանի հարձակմանը։

Իրանական լրատվամիջոցներն իրենց հերթին հայտնել էին, որ նախորդ ուրբաթ՝ տեղական ժամանակով մոտավորապես ժամը 03:00-ին, Սպահան նահանգի երկնքում անօդաչու թռչող սարքեր են նկատվել: Իրանի պետական ​​հեռուստատեսության տվյալներով՝ Սպահանի երկնքում Իրանի հակաօդային պաշտպանությունը երեք անօդաչու թռչող սարք է խոցել։

Ըստ «Tasnim» գործակալության՝ Իրանի տարածքում հրթիռային հարվածներ չեն հասցվել։

Իրանական բանակի գեներալ Սիյավուշ Միհանդուստը, որի խոսքը մեջբերում է գործակալությունը, պարզաբանել է, որ Իրանի Սպահան քաղաքում ձայնագրված բարձր ձայները կապված են «կասկածելի օբյեկտների ուղղությամբ հակաօդային պաշտպանության ուժերի կրակոցների հետ», և քաղաքում ավերածություններ կամ «պատահարներ» չեն գրանցվել։

Իրանական «Press TV» հեռուստաալիքի իրազեկ աղբյուրները հայտարարել են, որ Իրանի քաղաքները, այդ թվում՝ Սպահանը, չեն ենթարկվել օտարերկրյա որևէ պետության հարձակման։