Ոչ ոք չի ասել, որ Ուկրաինան ՆԱՏՕ-ի անդամ կդառնա հենց 10 տարուց․ Ստոլտենբերգ
ՆԱՏՕ-ի գլխավոր քարտուղար Յենս Ստոլտենբերգը հայտարարել է՝ ոչ ոք չի խոստացել, որ Ուկրաինան առաջիկա 10 տարվա ընթացքում կդառնա Հյուսիսատլանտյան դաշինքի լիիրավ անդամ։ Ըստ «Դետք»-ի՝ այս մասին Ստոլտենբերգն ասել է ամերիկյան CBS հեռուստաընկերության եթերում՝ պատասխանելով Ուկրաինայի՝ ՆԱՏՕ-ին անդամակցելու ժամկետների վերաբերյալ հարցին։
«Ոչ ոք չի ասել՝ հենց 10 տարուց, բայց ակնհայտ է, որ Ուկրաինային ՆԱՏՕ ընդունելու հարցը շատ լուրջ է»,- ասել է նա։
Յենս Ստոլտենբերգի համոզմամբ՝ ներկայումս ամենակարևոր բանը, որ հարկավոր է անել, Ուկրաինային տրամադրվող աջակցության ակտիվացումն է, որպեսզի վերջինս կարողանա հաղթել պատերազմում. «Սա նախապայման է Ուկրաինայի՝ ապագա ցանկացած անդամակցության համար»։
Հյուսիսատլանտյան դաշինքի գլխավոր քարտուղարը նկատել է, որ իրենց անհրաժեշտ է երկարաժամկետ և արդար խաղաղություն, իսկ «դրան հասնելու միակ ճանապարհը Ռուսաստանի Դաշնության նախագահ Վլադիմիր Պուտինին համոզելն է, որ ինքը մարտի դաշտում չի հաղթելու։ Նրա կարծիքով՝ Ռուսաստանի առաջնորդը պետք է համաձայնի այնպիսի լուծման, որի դեպքում Ուկրաինան կհաղթի որպես ինքնիշխան, անկախ եվրոպական երկիր։
Հիշեցնենք, որ օրերս Ստոլտենբերգը հույս էր հայտնել, որ Ուկրաինան մինչև 2034 թվականը ՆԱՏՕ-ի անդամ կդառնա։
Добавить комментарий