Իրաքը ցանկանում է ընդլայնել Իրանի հետ համագործակցությունը բոլոր ոլորտներում
Իրաքի վարչապետ Մոհամմեդ Շիա Սուդանին հայտարարել է, որ իր երկիրը շահագրգռված է զարգացնել երկկողմ, տարածաշրջանային և միջազգային համագործակցությունը Իրանի հետ այդ երկրի նորընտիր նախագահ Մասուդ Փեզեշքիանի պաշտոնավարման շրջանում։ Ըստ «Դետք»-ի՝ այս մասին տեղեկացնում է իրանական «Tasnim» լրատվական գործակալությունը։
Սուդանին շնորհավորել է Փեզեշքիանին Իրանի նախագահական ընտրությունների երկրորդ փուլում տարած հաղթանակի կապակցությամբ և ընդգծել, որ Իրաքը շատ լավատես է Իրանի հետ տարածաշրջանային ու միջազգային մակարդակներում երկկողմ համագործակցության ընդլայնման հարցում: Նա բարձր է գնահատել հարևանների հետ հարաբերությունների զարգացման Իրանի նորընտիր նախագահի որդեգրած քաղաքականությունը՝ նշելով, որ Իրաքի կառավարությունը մեծ նշանակություն է տալիս Իրանի հետ հարաբերություններին։
Սուդանին հույս է հայտնել, որ Իրանի նոր վարչակազմի օրոք երկու երկրները ականատես կլինեն իրենց հարաբերությունների հետագա ամրապնդմանն ու խորացմանը։
Իրանի նորընտիր նախագահն իր հերթին շնորհակալություն է հայտնել Սուդանիին շնորհավորական հեռախոսազանգի համար և ընդգծել Իրանի ցանկությունը՝ ընդլայնելու համագործակցությունն ու զարգացնելու երկկողմ հարաբերությունները բազմաթիվ ոլորտներում:
Добавить комментарий