Կատարն աշխարհի առաջնության ժամանակ ստեղծված շարժական տները նվիրաբերում է երկրաշարժից փրկվածներին

Կատարը նախատեսում է անցյալ տարվա Աշխարհի գավաթի խաղարկությունից 10․000 նավախցիկներ և վագոն-տնակներ ուղարկել՝ Թուրքիայի երկրաշարժից փրկվածներին ապաստան տրամադրելու համար, ասել են պաշտոնյաները:

Գազով հարուստ Պարսից ծոցի երկիրն ասում է, որ միշտ ծրագրել է նվիրաբերել շարժական տները: Դրանք օգտագործվել են՝ տեղավորելու ֆուտբոլի ամենամեծ մրցաշարի 1․4 միլիոն երկրպագուներին։  

Կատարի զարգացման հիմնադրամը հայտնել է, որ 350 կառույցից բաղկացած նախնական խմբաքանակն առաքվել է կիրակի:

Փետրվարի 6-ին 9 ժամ տարբերությամբ տեղի ունեցած 7․8 և 7․5 մագնիտուդ ուժգնությամբ երկրաշարժերը հարավարևելյան Թուրքիայում և պատերազմից տուժած Սիրիայի հյուսիսում ավելի քան 35․000 մարդու կյանք են խլել: Սպասվում է, որ զոհերի թիվը կավելանա, քանի որ որոնողափրկարարական խմբերն ավելի շատ դիակներ են հայտնաբերել:

Տասնյակ հազարավոր շենքեր ավերվել են կամ լուրջ վնասվել՝ միլիոնավոր մարդկանց անօթևան թողնելով։ Քանի որ ապաստարանները լցվել են երկրաշարժից հետո, շատերը ստիպված են եղել քնել դրսում թաց, ձմեռային եղանակին: Արաբական Միացյալ Էմիրությունները խոստացել է 100 միլիոն դոլար հատկացնել օգնության համար: Սաուդյան Արաբիան մատակարարումներով բեռնված ութ ինքնաթիռ է ուղարկել Թուրքիա և Սիրիա։