Ադրբեջանը 2025 թվականին կավելացնի պաշտպանության և ազգային անվտանգության ծախսերը՝ հասցնելով 8,55 միլիարդ մանաթի

Ադրբեջանի կառավարությունը որոշել է 2025 թվականին պաշտպանության և ազգային անվտանգության համար բյուջեի ծախսերը հասցնել 8 միլիարդ 555 միլիոն մանաթի։ 

Այս մասին երկուշաբթի օրը Միլլի Մեջլիսի լիագումար նիստում ասել է ֆինանսների նախարար Սամիր Շարիֆովը՝ «2025 թվականի պետական ​​բյուջեի մասին» օրինագծի երրորդ ընթերցմամբ քննարկման ժամանակ։ 

Նրա խոսքով՝ երկրորդ ընթերցումից հետո կառավարությունը հանրային իրավունքի  մի շարք  իրավաբանական անձանց առաջարկել է իրենց ծախսերն ապահովել ոչ թե պետբյուջեի, այլ սեփական եկամուտների հաշվին՝ մոբիլիզացնելով լրացուցիչ եկամուտների ներուժը։ 

Նախարարը նշել է՝  արդյունքում կթողարկվի մոտ 159 մլն մանաթ, որը կուղղվի Ադրբեջանի պաշտպանության և ազգային անվտանգության ամրապնդման միջոցառումների լրացուցիչ ֆինանսական աջակցությանը։ 

«Այսպիսով, 2025 թվականի պետբյուջեով նախատեսված պաշտպանության և ազգային անվտանգության ծախսերի ընդհանուր ծավալը կկազմի 8 միլիարդ 555 միլիոն մանաթ»,- ընդգծել է Շարիֆովը։