Թշնամին նորից պետք է զգա, որ իր ատամները ջարդվեցին. նրանք միայն ուժի լեզուն են հասկանում. Թևան Պողոսյան 

Սեպտեմբերի 1-ի առավոտյան ՀՀ պաշտպանության նախարարությունը հաղորդագրություն տարածեց՝ հայտնելով, որ Ադրբեջանն ինտենսիվ կրակ է բացել Սոթքի հատվածում տեղակայված հայկական դիրքերի ուղղությամբ՝ կիրառելով նաև ականանետ: Ավելի ուշ հակառակորդը թիրախավորեց նաև Նորաբակի հատվածը: Ժամը 17:30-ին Հայաստանի պաշտպանական գերատեսչությունը հայտարարեց, որ իրադրությունն առաջնագծում հարաբերականորեն կայուն է, սակայն հայկական կողմն ունի 3 զոհ և 2 վիրավոր: 

Ինչո՞վ էր պայմանավորված հակառակորդի հերթական ակտիվացումը: «Դետք»-ի հետ զրույցում քաղաքագետ Թևան Պողոսյանը կարծիք հայտնեց, որ Ադրբեջանը պարզապես օգտագործում է ամեն հնարավորություն իր վերջնական նպատակին՝ հայոց պետականության վերացմանը հասնելու համար:   

- Մեր թշնամիների համար չկա առանձին Արցախի կամ Հայաստանի հարց, դա մի հարց է, և քանի Ադրբեջանը տեսնում է, որ կարող է մեր դեմ ոտնձգություն անել, անելու է, մինչև չհասնի իր վերջնական նպատակին, իսկ նրանց վերջնական նպատակը հայոց պետականության վերացումն է: Ես չեմ հավատում, որ նրանք որևէ խաղաղության պայմանագրի են ձգտում կամ պատրաստ են Հայաստանի հետ ինչ-որ բան ստորագրել: 

Բացի դրանից՝ կան հատուկ կարևորության օրեր, որ մեր թշնամին փորձում է խամրեցնել իր գործողություններով: Այսօր սեպտեմբերի 2-ն է, հետո կլինի սեպտեմբերի 21-ը, սեպտեմբերի 27-ը, նոյեմբերի 9-ը և այլն: Նրանք ամեն առիթ օգտագործելու են, քանի դրա հնարավորությունն ունեն: Դա Ադրբեջանի քաղաքականությունն է դեռ 1990-ականներից սկսած: 

Այստեղ ամբողջ ցավն այն է, որ հայկական կողմն այդպես էլ դասեր չի քաղում՝ շատ լավ իմանալով, որ առնվազն արդեն հասունացել է ժամանակը, որ տարվա 365 օրը պետք է ունենալ «Համար 1» իրավիճակ, միշտ պատրաստ լինել թշնամու սադրանքներին: Թշնամին հասկանում է միայն ուժի լեզուն: Նախկինում էլ, եթե ամեն սադրանքից հետո նրանք տեղը տեղին պատիժ էին ստանում, որոշակի ժամանակ էինք շահում: 

Մինչև մենք չհասկանանք, որ մեր ամեն անգամվա պատիժն այն աստիճան պետք է լինի, որ թշնամին նորից զգա, որ իր ատամները ջարդվեցին, կրկին տեսնելու ենք այս վարքագիծն իրենց կողմից: 
Հետևաբար նորից պետք է վերականգնենք մեր հայրենիքը, նորից հաղթանակներ ապահովենք. միայն այդ դեպքում թշնամին լուռ կմնա, և մենք կունենաք որոշակի խաղաղություն: 

2020 թվականի սեպտեմբերի 27-ից հետո նույնիսկ աշխարհը մեզ ֆանտաստիկ ապացույցով ասաց, որ այն, ինչ մեզ ասում էին, ու մենք էլ հավատում էինք, սուտ է, մեզ խաբում էին: Ժողովրդավարություն, մարդու իրավունքներ… ժողովրդավարություններին չեն կրակում, չեն ճնշում… Սեպտեմբերի 27-ից աշխարհը մեզ ապացուցում է, որ մեզ ստել է, ու երևի արդեն մտածում են՝ սրանք ե՞րբ են դա հասկանալու: Սեպտեմբերի 27-ին պարզվեց, որ ավտորիտար Ալիևը շատ ավելի կարևոր է աշխարհի համար և իր գործողությունները շատ էլ լավ մարսում է: 

Եթե մենք այս դասերը չքաղենք, պարտությունը լինելու է պարտության հետևից: 

Ադրբեջանն ունի մեկ նպատակ՝ վերացնել հայոց պետականությունը, ու իրենք ավելի լավ են սերտել Մոնթեի ասածը, քան մենք ինքներս, որ «կորցնելով Արցախը՝ շրջելու ենք հայոց պետականության վերջին էջը», դրա համար էլ ամեն ինչ անում են, որ կորցնենք Արցախը: 

Պատերազմ են անում, շրջափակում, ամեն օր կրակում, մարդկանց սովի մատնում, ամեն ինչ անում են, որ Արցախը կորցնենք: Երեկվա դեպքերն ընդամենը դրա շարունակությունն են: Հատկապես հասկանալով, որ Արցախում տեղի են ունեցել նաև քաղաքական գործընթացներ, փոփոխություններ, փորձում են օգտագործել առիթը՝ իրենց նպատակին մոտենալու համար: