Ադրբեջանը բոլոր հիմքերը նախապատրաստում է այդ տարածքներում մարդկանց կյանքն անտանելի դարձնելու համար. Տաթևիկ Հայրապետյան. «MediaLAB.am»
«Մեդիալաբի» հարցերին պատասխանում է պատմական գիտությունների թեկնածու, ադրբեջանագետ Տաթևիկ Հայրապետյանը:
– Տավուշի շուրջ ստեղծված իրավիճակի վերաբերյալ Ադրբեջանում ի՞նչ արձագանքներ ու խմորումներ կան։
– Ադրբեջանական մամուլում բազմաթիվ հրապարակումներ կան ու ուղիղ տեքստեր, որ Ադրբեջանը ոչ միայն պետք է արագորեն վերահսկողություն սահմանի այդ տարածքների նկատմամբ, այլև բառացի ասում են, որ Ադրբեջանը դրանցով չպիտի բավարարվի, ընդհակառակը՝ պետք է շարունակի այս գործընթացը ու նոր դիրքային առավելությունների հասնի Հայաստանի նկատմամբ։
– Գործող իշխանությունը նշում է, որ այդ տարածքներն իրականում «ավերակներ են», ու որ իրենք Հայաստանից տարածքներ չեն տալիս Ադրբեջանին, այսինքն՝ ասում են, որ այդ տարածքները Ադրբեջանին են պատկանում։ Նման հայտարարությունները ի՞նչ նոր հնարավորություններ են ստեղծում Ադրբեջանի համար։
– Խնդիրն այն է, որ նախկինում հայկական կողմը հայտարարում էր, որ Ադրբեջանը չի կարող որևէ իրավական փաստաթուղթ ներկայացնել այդ տարածքների հետ կապված, և եթե Ադրբեջանը ներկայացնի, ապա կարող են երկխոսության գնալ։
Փաստացի, Ադրբեջանը ոչինչ չի ներկայացրել, որևէ քարտեզի շուրջ կոմպրոմիսի չի եկել, ու հայկական կողմը, առանց միջնորդի, առանց պայմանավորվածության ու տրամաբանության, գնում է ուղղակի զիջումների, ինչից, բնականաբար, Ադրբեջանը ոգևորվում է։
Սա ուղղակի պատուհան է բացում նոր ագրեսիաների համար, որովհետև ի հակադրություն Փաշինյանին աջակցող «արևմտամետների», որոնք պնդում են, թե դրանից հետո միջազգային հանրությունը կմիջամտի ու թույլ չի տա վտանգավոր զարգացումներ, սակայն տարբեր մայրաքաղաքներից հնչող հայտարարությունները փաստում են, որ իրենք ևս չեն հասկանում այս գործելաոճը։
Նրանց ձեռնտու չէ դուրս մնալ այս գործընթացներից, զրկվել Ադրբեջանի վրա բոլոր հնարավոր լծակներից, դրա համար էլ նմանատիպ հայտարարություններ են հնչում, որոնք Հայաստանի իշխանությունների որդեգրած հակապետական քաղաքականության ֆոնին համարվում են հայամետ հայտարարություններ, մինչդեռ ուղղակի տրամաբանական են ու ելնում են նախկին պայմանավորվածություններից։
– Իսկ Ադրբեջանը զինված հակամարտության դիմելու սցենարն աչքի առաջ ունի՞։
– Այո՛, միանշանակ, խոսում են, որ եթե իրենց պահանջները չբավարարեն, իրենք կարող են գնալ դրան, նաև որոշակիորեն հեգնում են, որ Փաշինյանն էլ է սեփական ժողովրդին սպառնում ու օգտագործում է Ադրբեջանին՝ Հայաստանին վախեցնելու համար, բայց այդ տարբերակն իրենք, բնականաբար, քննարկում են։ Այստեղ արդեն հարց է առաջանում, թե իշխանություններն ի՛նչ են անում դա կանխելու համար, փաստացի ոչինչ։
Ամբողջական հոդվածը՝ սկզբնաղբյուր կայքում։
Добавить комментарий