Ադրբեջանը և Սաուդյան Արաբիան ռազմական համագործակցության հարցեր են քննարկել

Ադրբեջանի պաշտպանության նախարար Զաքիր Հասանովը հանդիպել է պաշտոնական այցով երկրում գտնվող Սաուդյան Արաբիայի Թագավորության ռազմական պատվիրակության հետ։

Նախարարը հյուրերին տեղեկացրել է Արցախի օկուպացված տարածքներում ականազերծման միջոցառումների մասին և շնորհակալություն հայտնել այս հարցում Սաուդյան Արաբիայի ցուցաբերած աջակցության համար։

Հանդիպմանը քննարկվել են ռազմական ոլորտում համագործակցության զարգացման հեռանկարները, ռազմական կրթությունը, ինչպես նաև՝ տարածաշրջանային անվտանգության հարցեր։

Այնուհետեւ հյուրերը ժամանել են ադրբեջանական բանակի գլխավոր շտաբ։ Պաշտպանության նախարարի առաջին տեղակալ-Ադրբեջանի բանակի գլխավոր շտաբի պետ Քերիմ Վալիևը հանդիպում է ունեցել Սաուդյան Արաբիայի պատվիրակության հետ։

Հանդիպմանը ընդգծվել է փոխադարձ վստահության և աջակցության վրա հիմնված համագործակցության հետագա զարգացման հեռանկարը։ Կողմերը հատկապես նշել են փորձի փոխանակման կարևորությունը և քննարկել փոխադարձ հետաքրքրություն ներկայացնող մի շարք այլ հարցեր։