Հաճույքով կհանդիպեմ Թրամփին, ՌԴ-ի և ԱՄՆ-ի հարաբերություններն այնպիսին են, որ մի բաժակ սուրճի շուրջ հանդիպումը բավարար չէ․ Պուտին
Նախագահ Վլադիմիր Պուտինը դրական է գնահատել Էր Ռիադում ռուսական և ամերիկյան պատվիրակությունների բանակցությունների արդյունքները։ Ինչպես փոխանցում է Ռիա Նովոստին, այս մասին Պուտինը հայտարարել է լրագրողների հետ զրույցում։
«Ռուսաստանը առաջին քայլն է արել՝ վերսկսելու ԱՄՆ-ի հետ աշխատանքը տարբեր ոլորտներում, որտեղ կա փոխադարձ հետաքրքրություն, այդ թվում՝ Մերձավոր Արևելքը: Ռիադում կայացած հանդիպման նպատակն ու խոսակցության առարկան վստահության վերականգնումն էր։ Ռուսական պատվիրակությունը հայտնել է, որ Էր-Ռիադում բանակցություններում եղել են ԱՄՆ-ից մարդիկ, ովքեր բաց են եղել համատեղ աշխատելու համար։ Ռուսաստանն ու ԱՄՆ-ը պայմանավորվել են, որ դիվանագիտական առաքելությունների աշխատանքը կվերսկսվի բնականոն հունով»,- ասել է նա։
«Այստեղ ամենակարևորը բոլոր շատ հրատապ հարցերի, այդ թվում՝ ուկրաինական կարգավորման հարցում, այն է, որ առանց Ռուսաստանի և ԱՄՆ-ի միջև վստահության մակարդակի բարձրացման, պարզապես անհնար է լուծել շատ հարցեր, այդ թվում՝ ուկրաինական ճգնաժամը։
Ռուսաստանը չհրաժարվեց Ուկրաինայի և եվրոպացիների հետ բանակցություններից, նրանք էին, որ դադարեցրին կամ արգելեցին շփումները: Վաշինգտոնը ելնում է նրանից, որ բանակցությունները տեղի կունենան թե՛ Ռուսաստանի, թե՛ Ուկրաինայի մասնակցությամբ, Կիևին ոչ ոք չի բացառում»,-նշել է Պուտինը։
Խոսելով Թրամփի հետ հանդիպման մասին, նա նշել է, որ դրան դեռ պետք է նախապատրաստվել։
«Ես հաճույքով կհանդիպեմ ԱՄՆ նախագահ Դոնալդ Թրամփի հետ, վաղուց նրան չեմ տեսել, սակայն դա նախապատրաստություն է պահանջում։ Ռուսաստանի և ԱՄՆ-ի հարաբերություններն այսօր այնպիսին են, որ մի բաժակ սուրճի շուրջ հանդիպումը բավարար չէ։
Մենք պետք է պատրաստվենք տարբեր հարցերի շուրջ ընդունելի լուծումների հասնելու համար։ Ռուսաստանի և ԱՄՆ-ի միջև երկխոսության մեջ միջնորդների կարիք չկա։ Թրամփի հետ հանդիպում անցկացնելու ցանկությունը երկկողմանի է»,- նշել է Պուտինը։
Ավելացնել նոր մեկնաբանություն