Հայաստանին գերիների հարցով համագործակցության առաջարկը Ադրբեջանի հերթական խայծն է. Բեգլարյան

Այն, որ Ադրբեջանի դատախազությունն առաջարկել է Հայաստանին համագործակցել գերիների հարցով, հերթական խայծն է կամ այնպիսի քաղաքական պահանջ է, որը հետագայում կարող է դառնալ բանակցությունների առարկա և լրացուցիչ քաղաքական լծակ Հայաստանի և հայ ժողովրդի դեմ: Այս մասին, այսօր՝ դեկտեմբերի 26-ին, «Քաղաքական դատավարությունները Բաքվում, ի՞նչ է սպասվում Ռուբեն Վարդանյանին և Արցախի նախկին ղեկավարներին» թեմայով քննարկման ժամանակ նշեց Արցախի նախկին պետնախարար, Արցախի նախկին ՄԻՊ Արտակ Բեգլարյանը:

Նա համոզմունք հայտնեց, որ եթե Հայաստանը նմանատիպ հակընդեմ առաջարկով հանդես գա, դա տանելու է փակուցի և ադրբեջանական կողմն է ստիպված լինելու մերժել, որովհետև իրենք պատրաստ չեն որևէ հարցում համագործակցել:

«Իրենց համար հայերը մեղավոր են, և ադրբեջանցիները որևէ հանցագործություն չեն կատարել։ Այստեղ Հայաստանը հնարավորություն ունի հիմնավորված, փաստերով ցույց տալ և այնտեղ գտնվողների մեղքի բացակայությունը և ադրբեջանական կողմում պաշտոնավարող կամ տարբեր զինվորականների կատարած հանցագործությունները և դրանց հետաքննության անհրաժեշտությունը»,- նշել է նա:
 

Նրա խոսքով, այս առաջարկով նախ փորձում են կրկին Հայաստանին դնել այնպիսի պայմաններում, որ Հայաստանը մերժող կողմ լինի և միջազգային հանրությունը դիտարկի, որ Հայաստանը այստեղ ապակառուցողական է. «Մյուս կողմից իրենք այս առաջարկով փորձում են նաև ձև տալ, որ իրենք պատրաստ են համագործակցել, տվյալներ փոխանակել և այլն, և նաև Հայաստանից տվյալներ վերցնել: Բայց սա նաև մյուս կողմից հնարավորություն է Հայաստանի համար, որ այսպիսի բոլոր հարցերը վերհանվեն, և մեր այնտեղ գտնվող բոլոր գերիների, քաղաքական բանտարկյալների հարցերով Հայաստանը ավելի նախաձեռնողական և ավելի ակտիվ գործողություններ կատարի, և սա դարձնի նաև բանակցությունների թեմա։

Մյուս կողմից, սա նաև հնարավորություն է քննարկել հակամարտության ընթացքում, 80-ականների վերջից ի վեր, այն բոլոր փոխադարձ հնարավոր մեղադրանքները, որոնք մենք ունենք, այդ թվում ՀՀ-ի կողմից Հռոմի ստատուտի վավերացումից հետո: Այն հնարավորությունը, որ Հայաստանի Հանրապետությունը պետք է քննարկի նաև Միջազգային քրեական դատարանի հետաքննության հարցերը, և այս հարցում Ադրբեջանի ակնկալվող համագործակցությունը»:

Արտակ Բեգլարյանն ընդգծեց, որ Եվրոպական դատարանի մի քանի տասնյակի հասնող ակտեր կան հայերի վերաբերյալ, որոնք Ադրբեջանը ընդհանրապես չի կատարել.

«Կարելի է նաև այս հարցերն էլ բարձրացնել: Կարծում եմ, սա կրկին քաղաքական բանակցությունների թեմաներից պետք է լինի»,- ընդգծեց Արցախի նախկին պետնախարարը:

Հիշեցնենք, որ Բաքուն նոր ծավալուն մեղադրանք է առաջադրել Արցախի նախկին պետնախարար Ռուբեն Վարդանյանին, որը կարող է տանել ցմահ ազատազրկման: Վարդանյանին մեղադրանքներ են առաջադրվել Ադրբեջանի քրեական օրենսգրքի 20 տարբեր հոդվածներով՝ նրա դեմ առաջադրված մեղադրանքների ընդհանուր թիվը հացնելով 45-ի: