Հնդկաստանն անտեսել է Ադրբեջանի՝ «բարեկամ երկրի» միջոցով հաղորդած խնդրանքը՝ զենք գնելու վերաբերյալ․ The Print

Հնդկաստանից որոշակի զենք և պաշտպանական համակարգեր գնած Հայաստանի հետ իր շարունակական հակամարտության ֆոնին՝ Ադրբեջանը երրորդ երկրի միջոցով հայտնել է, որ ցանկանում է զենք գնել Նյու Դելիից՝ կշեռքները հավասարակշռելու համար:

Այս մասին գրում է The Print պարբերականը: Սակայն խնդրանքը, որը հասել է «շատ բարեկամ» երկրի միջոցով, անտեսվել է Հնդկաստանի կողմից։

Հայտնի է դարձել, որ Նյու Դելին հասկացրել է «բարեկամ երկրին», որ Հնդկաստանն ինքը կորոշի իր երկկողմ հարաբերություններն ու առաջնահերթությունները, և չի ցանկանում, որ որևէ այլ երկիր միջնորդ լինի։

Ծանոթ աղբյուրները The Print-ին հայտնել են, որ Բաքուն երբեք ուղղակիորեն չի շոշափել այդ թեման Նյու Դելիի հետ՝ ոչ պաշտոնապես, ոչ էլ ոչ պաշտոնական մակարդակներում:

Փոխարենը, երրորդ երկիր է դիմել Հնդկաստանին՝ հաղորդելով, որ եթե հարավասիական երկիրը ցանկանում է արտահանել իր սպառազինությունը և փնտրում է երկարաժամկետ գործընկեր, կարող է հայացքն ուղղել դեպի Ադրբեջան։ Ինչպես նշվել է, Երևանը վերջին տարիներին դիմել է Հնդկաստանին՝ իր զինված ուժերը ուժեղացնելու համար՝ Ադրբեջանի հետ հակամարտության ֆոնին, և գնել է հրթիռային կայաններ, հրետանային հրացաններ, զինամթերք, դիպուկահար հրացաններ, հակատանկային հրթիռներ:

Հավելվել է, որ Հնդկաստանի համար Հայաստանը ոչ միայն եղել է հետևողական պաշտպանական գործընկեր, այլև դիտարկվում է որպես քաղաքական գործընկեր տարածաշրջանում և սերտ կապեր ունի Ֆրանսիայի հետ։