Ադրբեջանական բանակի կադրային նոր փոփոխությունները

Բաքվի վարչախումբը բազմիցս ասել է, որ Հայաստանի հետ նոր պատերազմ չի ուզում, բայց զինված ուժերի զարգացումն ու հզորացումը շարունակելու է իրենց համար առաջնահերթություն լինել: Այս հարցում կարևոր դերակատարում ունի կադրային ճիշտ քաղաքականությունը:

Թշնամի երկրի զինված ուժերում հատկապես 2020 թվականի պատերազմից հետո թուրքական մոդելի բանակ ունենալու ակնկալիքով փոփոխություններ են լինում:

Դեռևս տարեսկզբին հատուկ նշանակության ուժերի հրամանատար, գեներալ-լեյտենանտ Հիքմեթ Միրզոևը նշանակվել է ցամաքային զորքերի հրամանատար, Բաքվի պաշտպանության փոխնախարար՝ փոխարինելով գեներալ-լեյտենանտ Էնվեր Էֆենդիևին։ Հատկանշական է, որ նա մասնակցել է 2016 թվականի քառօրյա և 2020 թվականի 44-օրյա պատերազմներին, բացի դրանից՝ եղել է այդ պատերազմներում իրականացրած գործողությունների գլխավոր ղեկավարներից մեկը: 2002 թվականին Հեյդար Ալիևի հրամանագրով Հիքմեթ Միրզոևին շնորհվել է գեներալ-մայորի կոչում, իսկ 2020 թվականի հոկտեմբերի 17-ին Իլհամ Ալիևի հրամանով շնորհվել է գեներալ-լեյտենանտի կոչում։ Ըստ ադրբեջանական աղբյուրների՝ Միրզոևը ղեկավարել է Ջրականի շրջանի և Շուշիի «ազատագրման» գործողությունները:

Միրզոևի նշանակումը ցամաքային զորքերի հրամանատարի և պաշտպանության փոխնախարարի պաշտոնում, ըստ էության, տեղավորվում է Ալիևի՝ երկրի զինված ուժերի հզորացման, հատուկ նշանակության ուժերի զարգացման տեսլականի տրամաբանության մեջ:

2023 թվականի ամռանը Ալիևը նշել էր, որ բանակում հատուկ նշանակության ջոկատների թիվը պետք է ավելանա, որպեսզի երկրի «անվտանգությանը սպառնացող վտանգի դեպքում ջախջախիչ հարվածներ հասցնեն թշնամու ուժերին»։

Շարունակելով կադրային փոփոխությունների թեման՝ նշենք, որ վերջերս Թուրքիայում Բաքվի Հանրապետության ռազմական կցորդ Մուշֆիգ Մամեդովը նշանակվել էր Բաքվի պաշտպանության նախարարության անձնակազմի կառավարման գլխավոր վարչության պետ, պաշտպանության փոխնախարար, այսինքն՝ դարձյալ լավ է տիրապետում թուրքական «ռազմական նրբություններին»:  

Ս.թ. մայիսի 18-ին հայտնի է դարձել, որ Բաքվի Հանրապետության ռազմաօդային ուժերի հրամանատարի տեղակալ Նամիկ Իսլամզադեն նշանակվել է ռազմաօդային ուժերի հրամանատար: Նա 1992 թվականին Թուրքիա է ուղարկվել ուսումը շարունակելու նպատակով, որն ավարտվել է 1996-ին՝ օդաչու-փորձարկող մասնագիտացմամբ: Իսլամզադեն 44-օրյա պատերազմի հերոս է: Մասնակցել է Վարանդայի գրավմանը: Գեներալի կոչում ստացել է 2020 թվականի դեկտեմբերի 7-ին:

Բացի դրանից՝ 44-օրյա պատերազմի ժամանակ Բաքվի Հանրապետության ԳՇ-ն «ղեկավարած» թուրք գեներալը՝ Բախտիար Էրսայը, Զաքիր Հասանովի խորհրդական է նշանակվել:

Այս ամենը հանրագումարի բերելով՝ հարկ է նկատել, որ Ալիևը երկրի զինված ուժերում բարձր պաշտոններ է վստահում 2020 թվականի պատերազմով անցածներին և թուրքական բանակի չափորոշիչներին տիրապետողներին: