Վրաստանի նախագահը պատմել է երկիրը Ռուսաստանի հետ պատերազմի դրդելու փորձերի մասին
Ուկրաինական հակամարտության մեկնարկից հետո Վրաստանին արտաքին ուժերը դրդում էին պատերազմի Ռուսաստանի հետ ՝ հանրապետությունը միայնակ թողնելով միջուկային տերության հետ: Այս մասին Radio Courtoisie-ին տված հարցազրույցում հայտարարել է Վրաստանի նախագահ Միխեիլ Կավելաշվիլին, նրա խոսքերը մեջբերում է ՏԱՍՍ-ը։
«Մեզ միայնակ էին թողնում միջուկային տերության հետ` առաջարկելով մեզ զենք տրամադրել։ Երիտասարդ եվրոպամետները մեզ ՌԴ-ի դեմ պատերազմի կոչ էին անում։ Այն ժամանակվա իշխանությանը ստիպում էին դա անել։ Հարց է առաջանում՝ Վրաստանը պետք է մասնակցե՞ր այդ պատերազմին»,- ասել է Կավելաշվիլին։
Ինչպես նշել է Վրաստանի նախագահը, նման կոչեր ի հայտ եկան Ուկրաինայում ռազմական գործողությունների մեկնարկի առաջին իսկ օրվանից։
«Մեզ կոչ էին անում միանալ պատժամիջոցներին, կամավորներ ուղարկել Ուկրաինա և աջակցել պատերազմին, մինչդեռ մենք ո՛չ ՆԱՏՕ-ի, ո՛չ էլ Եվրամիության անդամ չենք»,- հավելել է նախագահը։
Նա ընդգծել է, ազգային շահերը պաշտպանելու հարցում Վրաստանի իշխանությանն օգնել է ժողովուրդը։ Կավելաշվիլին քննադատել է Վրաստանի նախկին նախագահ Սալոմե Զուրաբիշվիլիի գործողությունները։
«Մի օր պատմությունը կընդունի, որ մենք փրկեցինք երկիրը: Մենք պետք է ճշմարտությունն ասեինք մեր քաղաքացիներին: Ափսոս, որ այն ժամանակ նախագահ Զուրաբիշվիլին կանգնած էր Մոլդովայի և Ուկրաինայի մեջքին»,- եզրափակել է Կավելաշվիլին:
Ավելացնել նոր մեկնաբանություն