Ես նախընտրում եմ Իրանի հետ խնդիրը լուծել դիվանագիտական ճանապարհով, բայց թույլ չեմ տա, որ աշխարհի թիվ մեկ ահաբեկչության հովանավորը միջուկային զենք ունենա. Թրամփ
ԱՄՆ նախագահ Դոնալդ Թրամփը Կոնգրեսում ուղերձում ընդգծել է, որ Իրանը երբեք չի ստանա միջուկային զենք և միաժամանակ մտահոգություն է հայտնել Թեհրանի հեռահար հրթիռային ծրագրի շարունակական զարգացման կապակցությամբ։
«Նրանք արդեն մշակել են հրթիռներ, որոնք կարող են սպառնալ Եվրոպային և մեր արտասահմանյան ռազմաբազաներին։ Այժմ նրանք աշխատում են ավելի հեռահար հրթիռների վրա, որոնք շուտով կկարողանան հասնել Միացյալ Նահանգներ»,- ասել է Թրամփը։
Թրամփը հիշեցրել է, որ Իրանին բազմիցս զգուշացրել են իրենց զինատեսակների ծրագիրը, հատկապես միջուկային զենքի ուղղությամբ, վերականգնելու ցանկացած փորձից հրաժարվելու մասին, սակայն Թեհրանը շարունակում է այդ ուղղությամբ աշխատանքները։
Թրամփը նշել է, որ Իրանը չի տվել հստակ հավաստիացումներ միջուկային զենք չզարգացնելու վերաբերյալ։
«Մենք բանակցություններ ենք վարում նրանց հետ։ Նրանք ցանկանում են գործարք կնքել, բայց մենք դեռ չենք լսել այն ամենակարևոր արտահայտությունը՝ «մենք երբեք չենք ունենա միջուկային զենք»»,- ասել է նա։
«Ես նախընտրում եմ այս հարցը լուծել դիվանագիտական ճանապարհով։ Սակայն մեկ բան բացարձակապես պարզ է. ես երբեք չեմ թույլ տա, որ աշխարհի գլխավոր ահաբեկչության հովանավորը՝ Իրանը, տիրի միջուկային զենքի։ Սա անընդունելի է»,- ընդգծել է ԱՄՆ նախագահը։
Ավելացնել նոր մեկնաբանություն