Իրանը կարծում է, որ հնարավոր է Ժնևում ԱՄՆ-ի հետ հավասար համաձայնության հասնել
Իրանը կարծում է, որ հնարավոր է Ժնևի բանակցություններում արդար և հավասարակշռված համաձայնության հասնել Միացյալ Նահանգների հետ։
Այս մասին հայտնել է Իրանի արտաքին գործերի նախարար Աբբաս Արաղչին հնդկական India Today հեռուստաալիքին տված հարցազրույցում։
«Ես կարծում եմ, որ արդար, հավասարակշռված և անաչառ համաձայնագիրը հասանելի է, և մենք կարող ենք դրան հասնել»,- ասել է Արաղչին։
«Ես մեկնում եմ Ժնև՝ ամերիկյան թիմի հետ մեր բանակցությունների երրորդ փուլին մասնակցելու համար։ Անցյալ անգամ մենք որոշակի առաջընթաց գրանցեցինք և կարողացանք գտնել փոխըմբռնում։ Ես հավատում եմ, որ դրա վրա հիմնվելով՝ մենք կարող ենք ինչ-որ բան կառուցել համաձայնագրի, գործարքի տեսքով»,- ասել է նախարարը՝ խոսելով Ժնև մեկնելուց առաջ։
Արտգործնախարարի խոսքով՝ Ժնևում համաձայնագիրը իրատեսական է, եթե Միացյալ Նահանգները ցուցաբերի բավարար վճռականություն։ Հարցին, թե արդյոք նա վստահ է այս հնարավորության մեջ, թե պարզապես հույս ունի դրա համար, Արաղչին ընդգծել է, որ «դա կախված է մյուս կողմի վճռականությունից»։
«Անկեղծ ասած, մենք լիովին համոզված չենք, որ նրանք ունեն դա անելու իրական վճռականություն»,- հավելել է նա։
Փետրվարի 26-ին Ժնևում կկայանա Իրանի և Միացյալ Նահանգների միջև անուղղակի բանակցությունների երրորդ փուլը՝ հանրապետության միջուկային ծրագրի շուրջ ստեղծված իրավիճակը կարգավորելու համար:
Ավելացնել նոր մեկնաբանություն