Իրանը շարունակում է հարվածներ հասցնել Պարսից ծոցի երկրներին
ԱՄՆ-ի և Իսրայելի կողմից Իրանի դեմ պատերազմի մեկնարկից հինգ շաբաթ անց Իսլամական Հանրապետությունը շարունակում է հարվածներ հասցնել Պարսից ծոցի հարևան երկրներին: Արաբական Միացյալ Էմիրությունների մայրաքաղաք Աբու Դաբիում արդյունաբերական օբյեկտի վրա հարձակումից հետո մեկ մարդ վիրավորվել է արկի բեկորներից: Այդ մասին տեղեկացնում է «Արմենպրես»-ը՝ վկայակոչելով Deutsche Welle-ն։
Ֆուջեյրա նավահանգստային քաղաքում իրանական անօդաչու թռչող սարքը հարձակվել է հեռահաղորդակցության ընկերության շենքի վրա, զոհեր չկան: ԱՄԷ-ի պաշտպանության նախարարության տվյալներով՝ ապրիլի 6-ին Իրանից արձակվել է 12 բալիստիկ հրթիռ, երկու թևավոր հրթիռ և 19 անօդաչու թռչող սարք: Իրանի հարձակումների հետևանքով վիրավորվել է չորս մարդ:
Տեղեկատվության համաձայն՝ հրթիռակոծվել է նաև Քուվեյթի հյուսիսային շրջանը, որի հետևանքով վեց մարդ վիրավորվել է։ Հորդանանը հայտնել է հարձակումների հետ կապված ինը միջադեպի մասին։ Հորդանանի զինված ուժերը որսացել են իրանական երեք անօդաչու թռչող սարքերից երկուսը։
Էր-Ռիադը նույնպես հայտնել է իրանական հարվածների մասին: Սաուդյան Արաբիայի պաշտպանության նախարարությունը հայտնել է, որ որսացել է երկու հարձակողական անօդաչու թռչող սարք: Դրանց անկման վայրերը չեն նշվել։
Միևնույն ժամանակ, հունական Patriot զենիթահրթիռային համակարգը Կարմիր ծովի Յանբու ալ-Բահր նավահանգստային քաղաքում խոցել է իրանական անօդաչու թռչող սարք: ՀՕՊ համակարգի տեղակայումը տարածքում Հունաստանի և Սաուդյան Արաբիայի միջև 2021 թվականին կնքված երկկողմ համաձայնագրի մի մասն է:
Ավելացնել նոր մեկնաբանություն