Իսրայելի արտգործնախարարը կառավարությանը Հայոց ցեղասպանության պաշտոնական ճանաչման մասին բանաձև կներկայացնի․ TOI
Իսրայելի արտգործնախարար Գիդեոն Սաարը ծրագրում է կիրակի օրը նախարարների կաբինետին առաջարկել բանաձև՝ Օսմանյան կայսրության գոյության վերջին տարիներին հայ ժողովրդի նկատմամբ իրականացված Ցեղասպանությունը պաշտոնապես ճանաչելու մասին, գրում է The Times of Israel պարբերականը՝ հղում անելով երկրի արտաքին քաղաքական գերատեսչությանը։
«Այս քայլը, անշուշտ, կհարուցի դիվանագիտական հակառակորդ Թուրքիայի դժգոհությունը։ Հայերը վաղուց են ձգտում 20-րդ դարի սկզբին տեղի ունեցած սպանությունների միջազգային ճանաչմանը որպես ցեղասպանություն, որոնց հետևանքով, առկա տվյալներով, զոհվել է շուրջ 1,5 միլիոն նրանց հայրենակից։ Թուրքիան, որը Օսմանյան կայսրության իրավահաջորդ պետությունն է, վճռականորեն մերժում է այն պնդումը, որ հայերի զանգվածային սպանությունները, բանտարկությունները և բռնի տեղահանությունները հավասարազոր են եղել ցեղասպանության։ Իսրայելը երկար ժամանակ խուսափում էր այդ սպանությունները որպես ցեղասպանություն ճանաչելուց՝ հարցի դիվանագիտական զգայունության պատճառով, սակայն նախագահ Ռեջեփ Թայիփ Էրդողանի օրոք Թուրքիայի հետ հարաբերությունների կտրուկ վատթարացումը, որը բազմիցս մեղադրել է Իսրայելին Գազայում ցեղասպանություն իրականացնելու մեջ, վերջին տարիներին ստիպել է նրան որոշակի քայլեր ձեռնարկել ճանաչման ուղղությամբ»,- նշվում է լրատվամիջոցի հրապարակման մեջ։
«Չնայած ծավալուն և աներկբա պատմական փաստաթղթերի առկայությանը՝ Հայոց ցեղասպանությունը մնում է ժխտման և նսեմացման կազմակերպված արշավի առարկա, ներառյալ պատմության դասագրքերի մանիպուլյատիվ վերաշարադրումը՝ առաջին հերթին Թուրքիայի կողմից,- ասված է առաջարկին կից Իսրայելի ԱԳՆ բացատրական տեքստում։- Այս բարոյական և պատմական պարտավորության լույսի ներքո՝ Իսրայելի կառավարությանն առաջարկվում է ճանաչել հայ ժողովրդի դեմ իրականացված ցեղասպանությունը Օսմանյան կայսրության վերջին տարիներին։ Բացի դրանից, հաշվի առնելով Հայոց ցեղասպանության արհավիրքները քողարկելու, նսեմացնելու կամ ժխտելու շարունակական փորձերը, առաջարկը կոչ է անում դատապարտել այդ իրադարձությունների վերաբերյալ պատմական ճշմարտությունը խեղաթյուրելու բոլոր փորձերը»։
Աղբյուր` News.am
Ավելացնել նոր մեկնաբանություն