Իսրայելի կողմից Հայոց ցեղասպանության ճանաչումը սրել է Բաքու-Թել Ավիվ հարաբերությունները
Իսրայելի կողմից Հայոց ցեղասպանության ճանաչման նախաձեռնությունը լարվածություն է առաջացրել Բաքվի և Թել Ավիվի հարաբերություններում։ Ynet-ի տեղեկություններով՝ Ադրբեջանը այդ որոշումը դիտարկում է որպես անսպասելի և զգայուն քայլ՝ հաշվի առնելով երկու երկրների երկարամյա համագործակցությունը։
Ադրբեջանական կողմի դժգոհությունը պայմանավորված է ոչ միայն ճանաչման փաստով, այլև այն հանգամանքով, որ որոշումը հրապարակվել է առանց նախնական լայն քննարկումների։ Ըստ աղբյուրների՝ Իսրայելի արտգործնախարար Գիդեոն Սաարը ադրբեջանցի գործընկերոջ հետ կապ է հաստատել միայն հայտարարությունից հետո, ինչը Բաքվում ընկալվել է որպես արդեն ընդունված որոշման մասին տեղեկացում։
Ադրբեջանում մտահոգություն են հայտնում, որ այս քայլը կարող է ազդել տարածաշրջանային հարցերում Իսրայելի և Ադրբեջանի փոխըմբռնման վրա։ Բաքուն նաև ուշադրություն է հրավիրում այն հանգամանքի վրա, որ որոշ կառույցներ, որոնք Իսրայելին մեղադրում են Գազայի գործողությունների համատեքստում, Ադրբեջանին ևս քննադատում են էթնիկ զտումների վերաբերյալ մեղադրանքներով։
Ադրբեջանի իշխանությունները նախկինում ակնկալում էին, որ Իսրայելը հայկական հարցի վերաբերյալ նման դիրքորոշում չի որդեգրի՝ հաշվի առնելով երկու երկրների սերտ կապերը և Ադրբեջանի աջակցությունը Իսրայելի քաղաքական դիրքորոշումներին տարբեր միջազգային հարցերում։
Ynet-ի փոխանցմամբ՝ Բաքվում այժմ հարց են բարձրացնում, թե արդյոք այս որոշումը չի վնասի երկու երկրների հարաբերություններին, որոնք մինչ այժմ համարվել են ռազմավարական գործընկերության օրինակ։
Միևնույն ժամանակ, ադրբեջանական կողմը հույս ունի, որ ստեղծված իրավիճակը չի վերածվի ավելի խոր դիվանագիտական ճգնաժամի, և հարցը չի հասնի Իսրայելի խորհրդարանում վերջնական հաստատման փուլին։
Ավելացնել նոր մեկնաբանություն