Քուրդ ընդդիմադիրները հերքել են Իրան ներխուժելու մասին տեղեկությունները
Իրանական քուրդ մի շարք ընդդիմադիր խմբավորումներ կտրականապես հերքել են միջազգային լրատվամիջոցների տարածած այն տեղեկությունները, թե իրենց զինված ուժերը հատել են սահմանն ու մտել Իրանի քրդաբնակ շրջաններ՝ Արևելյան Քրդստան (Ռոժհելատ)։ Այս հրապարակումները հաջորդել են Իրանի դեմ ԱՄՆ-ի և Իսրայելի իրականացրած համակարգված հարձակումներին։
Իրանի Քրդստանի դեմոկրատական կուսակցության (PDKI) պաշտոնյան, անանուն մնալու պայմանով, «Rudaw» լրատվականին հայտնել է, որ իրենց ուժերից որևէ մեկը չի մտել Իրանի տարածք։ Նա շեշտել է, որ նման լուրերը նպատակ ունեն պառակտում մտցնել քրդական ուժերի նորաստեղծ դաշինքի ներսում։ Հատկանշական է, որ ընդամենը մեկ շաբաթ առաջ իրանական քրդական հինգ կուսակցություններ հայտարարել էին «Քրդստանի կուսակցությունների կոալիցիայի» ստեղծման մասին, որի նպատակն է միավորել ջանքերը Իսլամական Հանրապետության դեմ և առաջ մղել քրդերի ինքնորոշման հարցը։ Չորեքշաբթի օրը այս դաշինքին է միացել նաև «Կոմալա» կուսակցությունը։
«Կոմալա» կուսակցության ներկայացուցիչները նույնպես հաստատել են, որ թեև իրենք գտնվում են մարտական պատրաստվածության վիճակում՝ հաշվի առնելով բոլոր հնարավոր զարգացումները, սակայն սահմանը հատելու մասին լուրերը կեղծ են։ Այս հերքումները հաջորդել են «Fox News»-ի հրապարակմանը, որտեղ, վկայակոչելով ամերիկացի անանուն պաշտոնյայի, նշվում էր, թե իբր «հազարավոր իրաքյան քրդեր» ցամաքային հարձակում են սկսել Իրանի ուղղությամբ։
Միևնույն ժամանակ, «Associated Press»-ը, հղում անելով Քրդստանի ազատության կուսակցությանը (PAK), հայտնել էր, որ որոշ ստորաբաժանումներ շարժվել են դեպի սահմանամերձ գոտի։ Այս լուրը տարածվել էր այն բանից հետո, երբ PAK-ի բազան ենթարկվել էր իրանական հրթիռակոծության, ինչի հետևանքով զոհվել էր մեկ մարտիկ։ Այդուհանդերձ, PAK-ի օպերատիվ գրասենյակը ևս հերքել է սահմանը հատելու մասին պնդումները՝ դրանք անվանելով անհիմն։
Իրավիճակին արձագանքել է նաև Իրաքյան Քրդստանի վարչապետ Մասրուր Բարզանիի խորհրդական Ազիզ Ահմադը։ Նա սոցիալական հարթակներում կատարած գրառմամբ հստակեցրել է, որ ոչ մի իրաքյան քուրդ սահմանը չի հատել, և տարածվող լուրերը բացարձակապես չեն համապատասխանում իրականությանը։
Ավելացնել նոր մեկնաբանություն