«Լուկաշենկոն միայն միջոց է». ի՞նչ խնդիր է լուծում Փաշինյանն ըստ քաղաքագետի

Պատճառաբանությունը, որով ՀՀ վարչապետը չմեկնեց ՌԴ` ԵԱՏՄ բարձրագույն տնտեսական խորհրդի նիստին մասնակցելու, հավատ չի ներշնչում։ Sputnik Արմենիայի հետ զրույցում այս մասին ասաց քաղաքագետ Հրանտ Միքայելյանը։

Ինչպես հայտնել ենք, Փաշինյանը դեկտեմբերի 25-ին սոցցանցում գրեց, որ կորոնավիրուսի թեստի դրական պատասխանի պատճառով չի մասնակցի ԱՊՀ ոչ պաշտոնական գագաթնաժողովին։ Ավելի ուշ հայտնի դարձավ, որ Հայաստանի վարչապետը տեսակապի միջոցով կմասնակցի Եվրասիական տնտեսական բարձրագույն խորհրդի նիստին:

«Թույլ տվեք չհավատալ այն հայտարարությանը, որ Covid-ի պատճառով է, որ նա անձամբ չի մասնակցել ԵԱՏՄ նիստին. Covid-ը` որպես տարբեր նիստերի չգնալու պատճառաբանություն, Փաշինյանը բազմաթիվ անգամներ բերել է։ Մինչդեռ ես նմանատիպ պատճառաբանություն չեմ լսել, երբ խոսք է գնացել ամերիկյան կամ եվրոպական որևիցե միջոցառման մասնակցել-չմասնակցելու մասին»,- ընդգծեց Միքայելյանը։

Նա կարծում է, որ թե՛ ՌԴ չմեկնելը, և թե՛ ԵԱՏՄ նիստի ժամանակ Բելառուսի նախագահ Ալեքսանդր Լուկաշենկոյի հետ տեղի ունեցած «լեզվակռիվը» մեկ նպատակ են հետապնդում` ՌԴ-ից ՀՀ-ն հեռացնելը, և դա թելադրվում է Արևմուտքի կողմից։

«Արևմուտքից խնդիր է դրված, որ ՀՀ-ն ԵԱՏՄ գոտում մեկուսանա, ու Փաշինյանն այդ խնդիրը լուծում է` որքան հնարավոր է` դիստանցիա պահելով եվրասիական ինստիտուտների հետ։ Դա դեռ մասնակի է արվում, ոչ թե լիարժեք` ինչպես, օրինակ, ՀԱՊԿ-ի դեպքում, որտեղ ֆորմալ առումով դեռ անդամակցում ենք։ Ռուսաստանից դիստանցիա պահելու քաղաքականության մասին է խոսքը, որտեղ Բելառուսն ընդամենը միջոց է դիտարկվում Փաշինյանի կողմից»,- նշեց քաղաքագետը։

Նրա խոսքով` եթե դիտարկում ենք Փաշինյանի պատճառաբանությունը, որ նեղացել է ադրբեջանամետ Լուկաշենկոյի քաղաքականությունից, ապա այդ դեպքում ինչո՞ւ Փաշինյանը չի նեղանում Եվրախորհրդի նախագահ Շառլ Միշելից, Ադրբեջանի նախագահ Իլհամ Ալիևից, Թուրքիայի նախագահ Ռեջեփ Թայիփ Էրդողանից, և անընդհատ փորձում է նրանց հետ հանդիպել։

«Եթե նրանցից չի նեղանում, ապա նրանց աջակից Լուկաշենկոյից ինչո՞ւ է նեղանում»,- տարակուսում է Միքայելյանը։