Իրանը պատրաստ է արտահանել իր ռազմական պաշտպանական արտադրանքը
Իրանի Իսլամական Հանրապետության զինված ուժերի շտաբի պետի տեղակալ Ազիզ Նասիրզադեն հայտարարել է, որ Իրանը պատրաստ է արտահանել իր ռազմական արտադրանքը՝ հարգելով այլ երկրների ինքնիշխանությունը։ Ըստ «Դետք»-ի՝ այս մասին տեղեկացնում է իրանական կառավարամետ «Mehr» լրատվական գործակալությունը։
Նասիրզադեն շեշտել է, որ արտահանելուց առաջ Թեհրանը պետք է համոզվի, որ այդ ապրանքները ճգնաժամ չեն ստեղծում որևէ ազգի համար: «Աշխարհն ականատես է լինում նոր հանգամանքների, որտեղ միաբևեռ համակարգն անկում է ապրում, և բազմաբևեռ համակարգ է առաջանում»,- ասել է նա։
Իրանի ԳՇ պետի տեղակալի խոսքով՝ Մոսկվայի անվտանգության համաժողովն օգնում է երկրներին կարծիքներ փոխանակել աշխարհում անվտանգություն հաստատելու համար։ Նրա համոզմամբ՝ այս համաժողովում անկախ երկրները կարող են մտքեր փոխանակել՝ ԱՄՆ-ի և նրա դաշնակիցների ճգնաժամային ու անապահովության փորձերին դիմակայելու համար։
Անդրադառնալով Ռուսաստանում անցկացվող պաշտպանական արդյունաբերության ցուցահանդեսին` Ազիզ Նասիրզադեն ասել է. «Մեր երկրի պաշտպանության նախարարությունն այս ցուցահանդեսում կցուցադրի շատ կարևոր ապրանքներ: Պաշտպանական արդյունաբերության ոլորտում մենք շատ ասելիք ունենք»։
Նա հայտարարել է, որ Իրանը ռազմավարական համագործակցություն ունի Ռուսաստանի հետ, ինչը, պաշտոնյայի համոզմամբ, կարող է օգնել աշխարհի տարբեր ծայրերում անվտանգության հաստատմանը։
#Դետքի_հետագծով
Իրանը և Ռուսաստանը վերջին տարիներին խորացնում են ռազմական փոխգործակցությունը, ինչը բխում է երկու երկրների շահերից։ Ռուս-իրանական փոխգործակցության ամրապնդմանը նպաստեց հատկապես Ուկրաինայում ընթացող պատերազմը, որն այս երկրներին էլ ավելի մերձեցրեց։
Ավելացնել նոր մեկնաբանություն