Հարավային Կովկասում այժմ խաղաղություն հաստատելու ժամանակն է. Աբդոլլահիան

Իրանի Իսլամական Հանրապետության արտաքին գործերի նախարար Հոսեյն Ամիր Աբդոլլահիանը հայտարարել է, որ այժմ Հարավային Կովկասում խաղաղություն հաստատելու ժամանակն է։ «Դետք»-ի հաղորդմամբ՝ այս մասին հայտնում է իրանական կառավարամետ «Mehr» լրատվական գործակալությունը։

«Հարավային Կովկասում պատերազմն ավարտվել է, և եկել է խաղաղության, համագործակցության ու տարածաշրջանում առաջընթացի ժամանակը։ Թեհրանում «3+3» ձևաչափով ԱԳ նախարարների հանդիպումը կարող է անկյունաքար դառնալ Հարավային Կովկասում խաղաղության հաստատման ճանապարհին»,- ասել է նա։

Աբդոլլահիանը նաև հույս է հայտնել, որ Վրաստանը նույնպես կմասնակցի այս ձևաչափի հաջորդ հանդիպումներին։ Նա այս համատեքստում շեշտել է ներտարածաշրջանային խաղացողների և հարևանների դերը՝ Հարավային Կովկասում առճակատմանը վերջ տալու համար։

Հիշեցնենք, որ Վրաստանը Ռուսաստանի Դաշնության հետ ունեցած տարաձայնությունների պատճառով բոյկոտել է այս ձևաչափի աշխատանքները։ 

#Դետքի_հետագծով

Իրանական կողմը ձգտում է տարածաշրջանում մնայուն խաղաղություն հաստատել, որի նպատակով էլ նախաձեռնել է «3+3» ձևաչափի այս հանդիպումը։ Թեհրանը կարևորում է, որ տարածաշրջանային խնդիրները լուծվեն բացապես տարածաշրջանային երկրների մասնակցությամբ, իսկ արտատարածաշրջանային դերակատարները որևէ պարագայում չներգրավվեն դրանցում։