Հայաստանն ավելի քան 70 օր հետաձգում է իր պատասխանը խաղաղության պայմանագրի վերաբերյալ առաջարկներին. Ադրբեջանի ԱԳՆ
Հայկական կողմը, որն ավելի քան 70 օր հետաձգում է իր պատասխանը խաղաղության պայմանագրի առաջարկներին, իր ներկայիս խափանող հայտարարություններով վնասում է կարգավորման գործընթացի հեռանկարները։
Այս մասին ասվում է Ադրբեջանի արտաքին գործերի նախարարության մեկնաբանությունում՝ Հայաստանի արտաքին գործերի նախարարության 2023 թվականի դեկտեմբերի 4-ի հայտարարությանն ի պատասխան:
«Մենք կտրականապես հերքում ենք Հայաստանի արտաքին գործերի նախարարության 2023 թվականի դեկտեմբերի 4-ի հայտարարությունը, որում ասվում է, որ ադրբեջանական կողմից արձակված կրակի հետևանքով հայ զինծառայող է զոհվել: Նման հայտարարություններով Հայաստանը միաժամանակ փորձում է ստեղծել արհեստական լարվածություն սահմանամերձ շրջաններում և գրավել երրորդ պետությունների ուշադրությունը»,- ասվում է հայտարարության մեջ։
Հիշեցնենք, որ դեկտեմբերի 4-ին ՀՀ Վայոց ձորի մարզի ուղղությամբ Հայաստան-Ադրբեջան պետական սահմանին Ադրբեջանի ԶՈՒ դիպուկահարի կրակոցից մահացու հրազենային վիրավորում է ստացել ՀՀ ԶՈՒ զինծառայող:
Պաշտոնական Երևանը խստորեն դատապարտել է ադրբեջանական կողմի՝ նոր էսկալացիա հրահրելու, խաղաղության գործընթացը ձգձգելու և այն փակուղի մտցնելու նպատակ ունեցող գործողությունները:
Ավելացնել նոր մեկնաբանություն