Իրանը հստակ դիրքորոշում ունի տարանցիկ միջանցքների հարցում. Նասեր Քանաանի
Իրանի Իսլամական Հանրապետության արտաքին գործերի նախարարության մամուլի խոսնակ Նասեր Քանաանին հայտարարել է՝ պաշտոնական Թեհրանը դիրքորոշում ունի Հարավային Կովկասի տարածաշրջանում տիրող իրավիճակի և տարանցիկ միջանցքների հարցում։ Ըստ «Դետք»-ի՝ այս մասին հայտնում է իրանական պետական IRNA լրատվական գործակալությունը։
Նա նշել է, որ Իրանը մեծ նշանակություն է տալիս տարածաշրջանում խաղաղության պահպանմանն ու ամրապնդմանը։
«Մենք մեծ ջանքեր ենք գործադրում տարածաշրջանի երկրներում խաղաղություն, կայունություն և անվտանգություն հաստատելու համար: Մենք ընդգծում ենք, որ տարանցիկ համագործակցության զարգացումը չի կարող հիմք հանդիսանալ աշխարհաքաղաքական փոփոխությունների և երկրների տարածքային ամբողջականության ու ազգային ինքնիշխանության խախտման համար»,- ասել է իրանցի պաշտոնյան։
Վերջինս միևնույն ժամանակ կարևորել է տարածաշրջանային համագործակցության «3+3» հարթակի գործունեությունը։ Նրա խոսքով՝ տարածաշրջանային խնդիրները պետք է լուծվեն բացառապես տարածաշրջանային երկրների մասնակցությամբ, իսկ դրանցում արտատարածաշրջանային դերակատարների ներգրավվածությունն անընդունելի է։
Հիշեցնենք, որ թուրք-ադրբեջանական խոսույթում վերջին շրջանում կրկին ակտիվացել է այսպես կոչված «Զանգեզուրի միջանցքի» թեման։
Ավելացնել նոր մեկնաբանություն