Հայելային հետքաշումը ենթադրում է, որ երկու կողմերն այսօր զբաղեցրած իրենց դիրքերից են հետ քաշվում. Պապոյան
Հայելային հետքաշումը ենթադրում է, որ երկու կողմերն այսօր զբաղեցրած իրենց դիրքերից հայելային հետ են քաշվում: Այս մասին այսօր՝ հունվարի 16-ին, ԱԺ-ում լրագրողների հետ զրույցում ասել է ՔՊ-ական պատգամավոր Գևորգ Պապոյանը:
Անդրադառնալով դիտարկմանը, որ ադրբեջանական զորքերն արդեն իսկ գտնվում են Հայաստանի տարածքում, և ստացվում է, որ մենք հետ ենք քաշվում մեր տարածքներից, իրենք հետ են քաշվում էլի Հայաստանի տարածքներից, Պապոյանն ասել է. «Դուք Ջերմուկը նկատի ունեք, բայց մենք 32 այդպիսի տեղ ունենք: Մենք Տավուշի մարզում բազմաթիվ գյուղեր ունենք, որ գյուղը դասական իմաստով մեր կազմում է, բայց 90-ականների պատերազմի արդյունքում գյուղի վարելահողերն իրենք գրավել են: Բա ինչո՞ւ մենք դրա մասին չենք խոսում: Հիմա մենք ասում ենք՝ «խաղաղության պայմանագիրը» պետք է ենթադրի, որ այն տեղերում, որտեղ կանգնած է ծանր տեխնիկա, իրենք հետ են քաշվում, նույն տեղում գալիս կանգնում են սահմանապահները, որոնք բնականաբար, բոլորովին այլ զենքերով են զինված:
Այնուհետև սկսում ենք սահմանազատում, սահմանագծում, որը կարող է ենթադրել, որ մենք ինչ-որ տեղում 100 մետր առաջ ենք գալիս, մեկ այլ տեղ հակառակը: Դա արդեն անում ենք քարտեզով»:
Ավելացնել նոր մեկնաբանություն