Իրանը կկանգնի Լիբանանի կողքին՝ սիոնիստական ռեժիմի ահաբեկչության դեմ պայքարում
Իրանի արտաքին գործերի փոխնախարար Ալի Բաղերի Կանին հայտարարել է, որ Իրանը միշտ կկանգնի լիբանանցիների կողքին՝ ընդդեմ սիոնիստական ռեժիմի (նկատի ունի Իսրայելին - խմբ․) կողմից իրականացվող պետական ահաբեկչության:
Ինչպես տեղեկացնում է իրանական «Mehr» լրատվական գործակալությունը, Իրանի փոխարտգործնախարարն այս մասին ասել է Բեյրութում Իրանի դեսպանատան նոր շենքում Իսլամական հեղափոխության հաղթանակի 44-րդ տարեդարձի ոգեկոչման արարողության ժամանակ իր ունեցած ելույթում։
Պաշտոնյան շեշտել է, որ 44 տարվա պատժամիջոցներից և առավելագույն ճնշումներից հետո Իրանի Իսլամական Հանրապետությունը հասել է բազմաթիվ ձեռքբերումների։ «Իրանի Իսլամական Հանրապետությունը միշտ կկանգնի լիբանանցիների կողքին՝ ընդդեմ սիոնիստական ռեժիմի պետական ահաբեկչության»,- ասել նա։
Ալի Բաղերի Կանին իր ելույթում կոչ է արել Իրաքի կառավարության համար հարմար իրավիճակ ստեղծել Իրանի և Սաուդյան Արաբիայի հարաբերությունները սերտացնելու նպատակով։ Նրա խոսքով՝ այլ ելք չկա, քան բարելավել հարաբերությունները հանուն քրիստոնյա և մուսուլման ազգերի հզորության, առաջընթացի և բարգավաճման։
Նա հավելել է, որ Իրանը Լիբանանի բարեկամն է՝ չնայած հակառակ պնդումների առկայությանը։
Ավելացնել նոր մեկնաբանություն