Իսրայելի դեմ Իրանի գործողությունը բարձրացրել է Թեհրանի դիրքերը. Ռայիսի
Իրանի Իսլամական Հանրապետության նախագահ Էբրահիմ Ռայիսին հայտարարել է, որ նախորդ ամիս Իսրայելի դեմ իրականացված պատասխան գործողությունը բարձրացրել է Իրանի դիրքերը տարածաշրջանային և համաշխարհային տերությունների շարքում։ Ըստ «Դետք»-ի՝ տեղեկությունը հաղորդում է իրանական «Tasnim» լրատվական գործակալությունը։
Իրանի նահանգապետների հետ կայացած հանդիպման ժամանակ Ռայիսին բարձր է գնահատել «Ճշմարիտ խոստում» գործողությունը, որն իրանցի զինվորականներն իրականացրել են իսրայելական ռազմական թիրախների դեմ անցյալ ամիս։ Իրանի նախագահն այս գործողությունը որակել է որպես կարևոր հանգրվան Իրանի պատմության մեջ:
Ըստ Ռայիսիի` այս գործողությունն ամրապնդել է Իրանի ուժը, հզորությունը, արժանապատվությունն ու հույսը, ինչպես նաև ապացուցել, որ Իրանի ժողովուրդը ձգտում է ազատ ու անկախ կյանքի։
Հիշեցնենք, որ ապրիլի լույս 14-ի գիշերը Իրանը մի քանի հարյուր ԱԹՍ և հրթիռներ է արձակել Իսրայելի ուղղությամբ՝ ի պատասխան Դամասկոսում ապրիլի 1-ին Իսրայելի կողմից Իրանի հյուպատոսության ռմբակոծման, որի հետևանքով իրանցի բարձրաստիճան զինվորական էր զոհվել։ Թել Ավիվի պնդմամբ՝ հարձակումը լուրջ հետևանքներ չի ունեցել՝ ԱԹՍ-ների ու հրթիռների գերակշիռ մասը Իսրայելն ու դաշնակիցները ոչնչացրել են օդում։
Ավելացնել նոր մեկնաբանություն