Իրանի և Թուրքիայի ԱԳ նախարարները քննարկել են տարածաշրջանային զարգացումները
Իրանի Իսլամական Հանրապետության արտաքին գործերի նախարար Հոսեյն Ամիր Աբդոլլահիանը Գամբիայում ընթացող Իսլամական համագործակցության կազմակերպության 15-րդ գագաթնաժողովի շրջանակում հանդիպում է ունեցել իր թուրք գործընկերոջ՝ Թուրքիայի արտաքին գործերի նախարար Հաքան Ֆիդանի հետ։ Ըստ «Դետք»-ի՝ տեղեկությունը հայտնում է իրանական կառավարամետ «Mehr» լրատվական գործակալությունը։
Հաղորդվում է, որ Աբդոլլահիանը բարձր է գնահատել Իսրայելի հետ առևտրային կապերը դադարեցնելու ուղղությամբ Թուրքիայի գործողությունները` կարևոր քայլ համարելով դրա վերաբերյալ Թուրքիայի կառավարության վերջին որոշումը։
Բացի դրանից` հանդիպման ընթացքում Իրանի և Թուրքիայի բարձրաստիճան դիվանագետները քննարկել են տարածաշրջանային վերջին զարգացումները և թուրք-իրանական հարաբերությունները։
Աբդոլլահիանը նաև անդրադարձել է Իսրայելի վրա Իրանի պատասխան հարձակմանը։ Նա այս համատեքստում շեշտել է, որ ռազմական գործողությունը համապատասխանում է Իրանի ինքնապաշտպանության օրինական իրավունքին:
Աբդոլլահիանն ու Ֆիդանն ընդգծել են Իրանի նախագահի` Թուրքիա կատարած այցի ընթացքում երկու երկրների միջև ձեռք բերված պայմանավորվածությունների իրականացման և տարբեր ոլորտներում համագործակցության համատեղ կոմիտեների ակտիվացման անհրաժեշտությունը։
Ըստ Հաքան Ֆիդանի` Իրանի հետ բոլոր ոլորտներում հարաբերությունների զարգացումը Անկարայի առաջնահերթություններից է։ Նա ողջունել է երկու երկրների միջև համագործակցության ամրապնդումը տարածաշրջանային և միջազգային հարթակներում։
Թուրքիայի արտգործնախարարը հավելել է, որ Անկարան Պաղեստինի հարցը դիտարկում է որպես իսլամական աշխարհի առավել կարևոր հարց՝ շեշտելով դրանում իսլամական պետությունների ավելի ակտիվ դեր խաղալու անհրաժեշտությունը։
Ավելացնել նոր մեկնաբանություն