Իրանի և Եգիպտոսի ԱԳ նախարարները քննարկել են Գազայում ստեղծված ճգնաժամը
Իրանի Իսլամական Հանրապետության արտաքին գործերի նախարար Հոսեյն Ամիր Աբդոլլահիանը և Եգիպտոսի արտաքին գործերի նախարար Սամեհ Շուքրին հանդիպել են Գամբիայում ընթացող Իսլամական համագործակցության կազմակերպության 15-րդ գագաթնաժողովի շրջանակում։ Ըստ «Դետք»-ի՝ տեղեկությունը հաղորդում է իրանական կառավարամետ «Mehr» լրատվական գործակալությունը։
Հաղորդվում է, որ կողմերը քննարկել են պաղեստինյան ժողովրդին օգնելու և Գազայի հատվածի վրա իսրայելական ռեժիմի հարձակումը կասեցնելու ծրագրերը։ Գնահատելով Գազայում պատերազմին վերջ տալու Եգիպտոսի ջանքերը՝ Ամիր Աբդոլլահիանը հայտնել է, որ Իրանը պատրաստակամ է Եգիպտոսի օգնությամբ պաղեստինյան անկլավ հումանիտար օգնություն հասցնել։
Շուքրին նույնպես դատապարտել է պաղեստինցի խաղաղ բնակիչների կոտորածը` շեշտելով Գազայի վրա յոթ ամիս շարունակվող հարձակման հետևանքով հասցված համատարած վնասը: Եգիպտոսի արտգործնախարարը հույս է հայտնել, որ շարունակվող քաղաքական ջանքերն ու բանակցությունները վերջ կդնեն Գազայի դեմ պատերազմին և կօգնեն վերականգնել պաղեստինցիների իրավունքները։
Հանդիպման ավարտին Իրանի և Եգիպտոսի արտաքին քաղաքական գերատեսչությունների ղեկավարները հույս են հայտնել, որ ԻՀԿ-ի այս գագաթնաժողովը կամրապնդի մուսուլմանների միասնությունը՝ հաջակցություն Պաղեստինի և կնպաստի տարածաշրջանային խնդիրների լուծմանը։
Ավելացնել նոր մեկնաբանություն