Ադրբեջանի մեջլիսում առաջարկել են Փաշինյանին Բաքու հրավիրել
Նախօրեին կայացած Ադրբեջանի մեջլիսի լիագումար նիստի ընթացում առաջարկել են Հայաստանի վարչապետ Նիկոլ Փաշինյանին հրավիրել Բաքու։ Ըստ «Դետք»-ի՝ ադրբեջանական լրատվամիջոցները հաղորդում են, որ նման առաջարկով հանդես է եկել Ադրբեջանի խորհրդարանի մարդու իրավունքների մշտական հանձնաժողովի նախագահ Զահիդ Օրուջը։
«Կարելի է Փաշինյանին Բաքու հրավիրել։ Դրա հետ մեկտեղ, Ադրբեջան տանող ճանապարհը պետք է փակ լինի այն բոլոր մարդկանց համար, որոնք մեր քաղաքական թշնամիներն են և հանդես են գալիս մեր երկրի դեմ պատժամիջոցներ կիրառելու կոչերով»,- հայտարարել է պատգամավորը։
Ադրբեջանի մեջլիսի լիագումար նիստի ընթացքում այդ երկրի օրենսդիրները թիրախավորել են նաև Հայ Առաքելական եկեղեցին․ մասնավորապես ՀՀ Վարդենիսի շրջանում ծնված պատգամավոր Սահիբ Ալիևը Հայ Առաքելական եկեղեցուն մեղադրել է սահմանազատման գործընթացը խափանելու փորձերի մեջ, ապա Հայ Առաքելական եկեղեցին «ահաբեկիչների որջ» անվանել։
«Արդեն մի քանի օր է, ինչ Հայաստանում դիմադրում են Ղազախի շրջանի չորս գյուղերի վերադարձին: Այդ առաքելությունը դրվել է Հայ եկեղեցու վրա, որը կրկին գործի է դնում հին ավանդույթները»,- նշել է ադրբեջանցի պատգամավորը՝ հիշատակելով Տավուշի թեմի առաջնորդի անունը:
Ադրբեջանցի պատգամավոր Սիյավուշ Նովրուզովն էլ համոզմունք է հայտնել, որ հայերը ոչ միայն ընդդիմանում են սահմանազատման գործընթացին, այլև փորձում Շուշիի կորստի վրեժը լուծել Ադրբեջանի դեմ արևմտյան պատժամիջոցների սահմանում հրահրելու միջոցով։
«Այսօր ամերիկացի կոնգրեսականը կամ ֆրանսիացի պատգամավորը, որն ի վիճակի չէ քարտեզի վրա Ադրբեջանը ցույց տալու, հանկարծ սկսել է ճանաչել, ասենք, ադրբեջանցի դատավորներին ու պահանջում է նրանց դեմ պատժամիջոցներ կիրառել»,- հայտարարել է Նովրուզովը։
Ադրբեջանցի պատգամավորը հավելել է՝ հայերից բացի` Ադրբեջանի դեմ են աշխատում նաև Արևմուտքից ֆինանսավորվող ադրբեջանցի լրագրողներն ու ընդդիմությունը, մասնավորաբար «Ժողովրդական ճակատի» առաջնորդ Ալի Քերիմլին։
#Դետքի_հետագծով
Մտահոգիչ է, սակայն հերթական անգամ ականատես ենք լինում, որ Հայաստանի գործող իշխանությունները՝ Նիկոլ Փաշինյանի գլխավորությամբ, վայելում են Ադրբեջանի և Թուրքիայի անվերապահ աջակցությունը։ Այս մասին է փաստում Նիկոլ Փաշինյանին Բաքու հրավիրելու ադրբեջանցի պատգամավորների առաջարկը՝ Հայաստանում ստեղծված իրավիճակի և երկու երկրների միջև դիվանագիտական հարաբերությունների բացակայության ֆոնին։
Ընթերցողին ցանկանում ենք հիշեցնել, որ Անկարայից և Բաքվից Նիկոլ Փաշինյանի իշխանությանն աջակցող հայտարարություններ էին հնչում նաև 2021 թվականի փետրվարին, երբ ՀՀ ԶՈՒ գլխավոր շտաբը պահանջել էր կառավարության հրաժարականը, իսկ Փաշինյանն այդ պահանջը որակել էր որպես ռազմական հեղաշրջման փորձ։ Հատկանշական է, որ ՀՀ-ում տեղի ունեցող իրադարձությունները հեղաշրջման փորձ որակեցին և դատապարտեցին միայն Հայաստանի, Թուրքիայի ու Ադրբեջանի իշխանությունները։
Ավելացնել նոր մեկնաբանություն